ཤིང་གི་མི་ལྷ་སར་གནས་སྐོར་དུ་ཕྱིན་པ།

ཀླུ་སྨྱོན་ཧེ་རུ་ཀས་བརྩམས།

སྔོན་མ་སྔོན་མ་ཞིག་ལ་ས་ཆ་ཞིག་ཏུ་གྲོང་གསེབ་ཅིག་ཡོད་པ་རེད། གྲོང་གསེབ་དེའི་མི་ཚོས་མི་ཚེའི་གཅིག་གི་རིང་ལྷ་སར་གནས་སྐོར་དུ་ཐེངས་གཅིག་འགྲོ་ཐུབ་ན་དེ་ནི་བསོད་ནམས་ཆེན་པོ་ཞིག་ཡིན་པས། ཚེ་འདི་དང་སྐྱེ་བ་རྗེས་མ་གཉིས་ཀར་ཕན་ཐོགས་ཆེན་པོ་ཞིག་ཡིན་པའི་ངོས་འཛིན་བྱེད་ཀི་ཡོད་པ་རེད། གྲོང་གསེབ་དེའི་ནང་དུ་བཟང་ཚང་གཉིས་དང་བྱིས་པ་ཞིག ད་དུང་ཤིང་གི་མི་ཞིག་བཅས་ཁྱོན་བསྡོམས་ནང་མི་བཞི་ཡོད་པ་རེད།

ཁོ་ཚོའི་གྲོང་གསེབ་དེའི་ནང་གི་མི་ཚང་ཕྱུག་པོ་མང་ཆེ་བས་རྟ་དང་གཡག་ཞོན་ནས་ལྷ་སར་ཚར་ཁ་ཤས་འགྲོ་མྱོང་བ་དང་། ཁོ་ཚོས་ཤིང་གི་མི་དེའི་ནང་མི་ཚོར། ཁྱོད་ཚོ་ག་རེ་བྱས་ནས་ལྷ་སར་འགྲོ་གི་མེད། ལྷ་སར་ཐེངས་ཤིག་མ་སོང་ན་མི་ལུས་ཐོབ་པ་ཡང་དོན་མེད་རེད། ཁྱོད་ཚོ་ལྷ་སར་ཐེངས་ཅིག་ངེས་པར་དུ་སོང་ཨ་ཞེས་སྐུལ་མ་བྱེད་ཀི་ཡོད་པ་རེད།

ཉི་མ་གཅིག་ཤིང་གི་མི་དེ་ཁྱིམ་མཚེས་ཕྱུག་པོ་ཚང་ཞིག་གི་སྒོ་ཁར་སོང་ནས། སྐུ་མཁྱེན། ང་ཚོར་རྟ་གསུམ་གཡར་རོགས་གནངས། ང་ཚོ་ལྷ་སར་ཐེངས་ཤིག་འགྲོ་རྩིས་ཡོད་ལབ་པར། མི་ཚང་ཕྱུག་པོ་དེའི་ཕ་རྒན་གྱིས་གདོང་པ་ནག་པོ་བསྟན་ཏེ། ང་ཚོར་རྟ་གཡར་རྒྱུ་མེད། ང་ཚོའི་རྟ་ལ་ཤིང་གི་མི་ཞོན་ན་ང་ཚོའི་རྟའི་རྒྱབ་ལ་རྨ་བཟོ་གི་རེད་ལབ་ནས་རྟ་མ་གཡར་བ་རེད།

ཡང་ཤིང་གི་མི་དེ་ཁྱིམ་མཚེས་ཕྱུག་པོ་གཞན་ཞིག་གི་སྒོ་ཁར་སོང་སྟེ། ཐུགས་རྗེས་གཟིགས། ང་ཚོར་གཡར་བཞི་གཡར་རོགས། ང་ཚོ་ལྷ་སར་ཐེངས་ཤིག་འགྲོ་གི་ཡིན་ལབ་པར། ཁྱིིམ་མཚེས་དེའི་མ་རྒན་གྱིས་སྐད་གདངས་དྲག་པོས། ང་ཚོར་གཡག་གཡར་རྒྱུ་མེད། ང་ཚོའི་གཡག་ལ་ཤིང་གི་མི་ཞོན་ནས་ལྷ་སར་སོང་ན་ང་ཚོའི་གཡག་གི་རྒྱབ་ནས་སྤུ་ཚང་མ་བུད་འགྲོ་གི་རེད་ལབ་ནས་གཡག་མ་གཡར་བ་རེད།

དེ་ནས་ཤིང་གི་མི་བཟའ་ཚང་གང་བོས་རྩམ་པ་ཁུག་མ་ཆེན་པོ་ཞིག་གི་གང་དང་ཤ་མར་ཏོག་ཙམ་ཞིག་གྲ་སྒྲིག་བྱས་ཏེ་ལྷ་སར་འགྲོ་བའི་ལམ་དུ་ཆས་པ་རེད། དེ་དུས་དབྱར་ཁ་ཡིན་པས་ཉི་མ་རྟག་པར་ཆར་བ་གཏོང་གི་ཡོད་པ་དང་། ལམ་ཁ་ནས་བཟའ་ཚང་གཉིས་དང་བྱིས་པའི་དུག་ལོག་ཚང་མ་ཆར་བས་རློན་པ་རློན་རྐྱང་བཟོ་གི་ཡོད་པ་རེད། དགོང་མོ་རེ་རེར་བཟའ་ཚང་གཉིས་དང་བྱིས་པ་གཉིད་ཁུག་ཡོད་པའི་སྐབས་སུ། ཤིང་གི་མིས་ཁོ་ཚོའི་དུག་ལོག་རློན་པ་ཚོ་རང་གི་ལུས་སྟེང་དུ་དཔྱངས་ནས་སྐམ་པོ་བཟོ་གི་ཡོད་པ་རེད། རྒྱུ་མཚན་ནི་ཤིང་གི་མིའི་གཟུགས་པོ་ཆ་ཚང་ཤིང་ཡིན་པས་ཆར་བས་དེ་ཙམ་རློན་པ་བཟོ་ཐུབ་ཀི་ཡོད་པ་མ་རེད།

འབྲོག་པ་ཡོད་སའི་ས་ཆ་བརྒྱུད་ནས་འགྲོ་དུས་སུ། འབྲོག་པའི་ཁྱི་ཆེན་པོ་དེ་ཚོས་ཐག་རིང་ནས་ཡོང་བའི་གནས་སྐོར་བ་དེ་ཚོའི་སྒང་ལ་མཆོངས་ཡོང་ནས་བཟའ་གྲབ་བྱེད་པ་དང་སྟབས་མ་ལེགས་ན་སོ་ཡང་རྒྱག་གི་ཡོད་པ་རེད། དེ་དུས་གནས་སྐོར་བ་བཟའ་ཚང་གཉིས་དང་ཁོ་ཚོའི་བྱིས་པ་ཆུང་ཆུང་དེ་སྐྲག་ནས་འདར་སིག་སིག་བྱེད་ཀི་ཡོད་པས། ཐེངས་མ་རེ་རེ་བཞིན་ཤིང་གི་མི་དེ་ཁྱིའི་གདོང་ལ་བུད་ནས་རང་གི་ལུས་པོར་སོ་རྒྭག་གི་འཇུག་གི་ཡོད་པ་དང་། འབྲོག་ཁྱི་དེ་ཚོས་ཤིང་གི་མིའི་ལུས་པོ་སོ་བརྒྱབ་མ་ཐག་རང་རང་གི་སོ་ན་ནས་ཕྱིར་བྲོས་འགྲོ་གི་ཡོད་པ་རེད།

ས་ཆ་མང་པོ་ཞིག་ཏུ་རྒྭགས་ཆུ་གཏིང་ཟབ་པོ་ཅན་མང་པོ་ཞིག་ལ་ཟམ་པ་ནམ་ཡང་བཙུགས་མེད་པས། གནས་སྐོར་བ་མང་པོ་ཞིག་ཆུ་ལ་བརྒལ་དུས་སྟབས་མ་ལེགས་པར་རྐང་བ་འགྲེད་བརྡར་ཤོར་ནས་ཆུ་ནང་དུ་འགྱེལ་ཏེ་ནམ་ཡང་རྙེད་རྒྱུ་མེད་པ་ཆགས་ཀི་ཡོད་པ་རེད། ཐེངས་མ་རེ་རེ་བཞིན་ཤིང་གི་མིའི་ནང་མི་ཚོ་རྒྱུུགས་ཆུ་ཡོད་ས་ལ་བསླེབས་དུས། ཤིང་གི་མིས་རང་གི་གཟུགས་པོ་དེ་ཆུ་ཕར་ཁ་ཚུར་ཁ་ལ་བསྲིངས་ཏེ་ཟམ་པ་སྟབས་བདེ་བོ་ཞིག་བཟོ་གི་ཡོད་པ་དང་། བཟའ་ཚང་གཉིས་དང་ཕྲུ་གུ་ཆུང་ཆུང་དེ་ཁོའི་སྒལ་བའི་སྟེང་དུ་གོམ་པ་སྤོས་ནས་ཆུའི་ཕ་རོལ་དུ་བསླེབས་ཚར་བ་ན། གཞི་ནས་ཤིང་གི་མི་ཁོ་རང་ཆུ་ལ་བརྒལ་ནས་ཡོང་གི་ཡོད་པ་རེད་ལ། ཆུ་ཆེན་པོ་དང་ཐུག་ན་ཤིང་གི་མི་ཁོ་རང་ཡང་ཆུས་འཁྱེར་གྲབ་བྱེད་ཀི་ཡོད་པ་རེད།

སྐབས་རེར་ལམ་ཁ་དེ་ཆུའི་འགྲམ་ནས་ཐག་རིང་དུ་བསྲིངས་ཡོད་ན། ཤིང་གི་མི་དེ་ཆུ་ནང་བརྒྱུད་ནས་ཡོང་གི་ཡོད་པ་རེད། དེ་ལྟར་བྱས་ནས་ཁོའི་ལུས་སྟེང་གི་ལོ་མ་དེ་ཚོ་རྒྱུན་རིང་པོར་གནས་ཐུབ་ཀི་ཡོད་པ་རེད་ལ། མཚམས་མཚམས་ལ་ཁོའི་ལུས་སྟེང་དུ་ཤིང་ཏོག་ཆུང་ཆུང་དེ་འདྲ་སྐྱེས་ཀི་ཡོད་པ་དང་། ཕྲུ་གུ་ཆུང་ཆུང་དེས་ལག་པ་ཆུང་ཆུང་དེ་ཕར་བསྲིངས་ནས་ཤིང་གི་མི་ལ། ཇོ་ཇོ་ཤིང་གི་མི་ལགས། ངས་ཁྱེད་རང་གི་གཟུགས་པོའི་སྒང་གི་ཤིང་ཏོག་ཟོས་ན་ཨེ་ཆོག་ཅེས་སྐད་ཆ་འདྲི་བ་དང་། ཤིང་གི་མིས་ལམ་སེང་རང་གི་ལུས་པོའི་སྒང་གི་ཤིང་ཏོག་དེ་ཚོའི་ནང་ནས་གཅིག་གཉིས་རེ་བཏོགས་ནས་ཕྲུ་གུ་དེ་ལ་སྤྲོད་ཀྱི་ཡོད་པ་རེད།

ཡང་ས་ཆ་ལ་ལར་བསླེབས་དུས་བྱང་རླུང་དྲག་པོ་གཡུགས་ནས་ཤིང་གི་མིའི་ནང་མི་ཚོ་མདུན་དུ་གོམ་པ་གང་ཡང་སྤོ་མི་ཐུབ་པར་སྡོད་ཀྱིི་ཡོད་པ་དང་། དེ་དུས་ལམ་སེང་ཤིང་གི་མིས་བཟའ་ཚང་གཉིས་དང་བྱིས་པ་ཆུང་ཆུང་དེ་ཁོའི་མདུན་ལ་སྡོད་བཅུག་པ་དང་། ཁོ་རང་རླུང་དྲག་པོའི་མདུན་དུ་འགྲེངས་ནས་ཁོ་ཚོར་སྲུང་སྐྱོབ་བྱེད་ཀི་ཡོད་པ་རེད། དེ་དུས་སྟབས་མི་ལེགས་པར་ཤིང་གི་མིའི་ལུས་སྟེང་གི་ལོ་མ་མང་པོ་ཞིག་རླུང་གིས་འཁྱེར་འགྲོ་གི་ཡོད་པ་རེད། ཡིན་ན་ཡང་ཤིང་གི་མིས་རང་གི་ནང་མི་ཚོ་ཁོའི་ལུས་པོའི་འཁྲིས་ལ་སྦྱར་ནས་བསྡད་ཡོད་པ་མཐོང་དུས་རྒྱང་རིང་དུ་རླུང་གིས་ཁུར་སོང་བའི་ལོ་མ་དེ་ཚོར་ལྟ་བཞིན་སེམས་པ་ཧ་ཅང་སྐྱིད་པོ་ཡོད་པ་རེད།

དབྱར་ཁར་ཚ་བ་ཆེ་དུས། ཤིང་གི་མིའི་ནང་མི་ཚོ་ཉི་མ་ཚ་བོས་བསྲེགས་ཏེ་ཁ་སྐོམ་ཞིང་ཐང་ཆད་པའི་དུས་སུ། ནམ་མཁའ་སྔོ་ཐིང་ཐིང་ཡོད་པ་མ་གཏོགས་སྤྲིན་པ་ཆུང་ཆུང་སེན་མོ་ཙམ་ཞིག་ཀྱང་ནམ་མཁར་འཁོར་གི་མེད་པ་རེད། དེ་དུས་ཤིང་གི་མིས་རང་གི་ཡལ་ག་དང་ལོ་མའི་བསིལ་གྲིབ་འོག་ཏུ་ནང་མི་ཆ་ཚང་སྡོད་དུ་བཅུག་སྟེ་ཁོ་ཚོ་ཉི་མའི་ཚ་གདུང་ལས་སྐྱོབ་ཀི་ཡོད་པ་དང་། ད་དུང་རང་གི་ལུས་སྟེང་གི་ལོ་མ་ལྷེབ་ཆེན་དེ་འདྲ་ཞིག་ཕར་གཡུག་ཚུར་གཡུག་བྱས་ཏེ་བྱིས་པ་ཆུང་ཆུང་དེ་གཉིད་ཁུག་ཐབས་བྱེད་ཀི་ཡོད་པ་རེད།

ཉིན་ཞིག་ཁོང་ཚོ་གྲོང་གསེབ་ཅིག་ལ་བསླེབས་དུས། དེ་ན་ཨ་མ་རྒན་འཁོགས་ཤིག་གིས་རྐང་པ་ཡ་གཅིག་འཁྱོར་བཞིན་འགྲོ་བ་ཞིག་མཐོང་བ་དང་། ཤིང་གི་མིས་ཨ་མ་དེ་ལ། ཁྱེད་རང་དགུང་ལོ་བགྲེས་པའི་སྟེང་དུ་ཞབས་ཡ་གཅིག་ཐང་པོ་མི་འདུག་པས། ད་ནི་ཁྱེད་ལ་འཁར་རྒྱུགས་ཤིག་དགོས་ཀྱི་འདུག་ལབ་པར། ཨ་མ་དེས། མོ་རང་ཧ་ཅང་དབུལ་བོ་ཞིག་ཡིན་པས་འཁར་རྒྱུགས་རྙིང་པ་ཞིག་ཡོད་པ་དེ་ཆག སོང་བའི་ཚབ་ལ་གསར་པ་ཉོ་བའི་དངུལ་མེད་ཅེས་བརྗོད། དེ་ནས་ཤིང་གི་མིས་ཨ་མ་རྒན་འཁོགས་དེ་ལ་སྙིང་རྗེ་ཆེན་པོ་ཞིག་སྐྱེས་ནས་རང་གི་གཟུགས་པོའི་སྒང་ནས་འཁར་རྒྱུགས་ཤིག་གི་ཚད་ལོངས་པ་ཞིག་དྲས་ཏེ་ཨ་མ་རྒན་མོ་དེར་འཁར་རྒྱུགས་ཡག་པོ་ཞིག་བཟོས་ནས་སྤྲད་པས། རྒན་མོ་དེ་དགའ་དྲགས་ནས་མིག་ནས་མཆི་མ་བཞུར་བཞིན་ཤིང་གི་མི་ལ་བཀའ་དྲིན་ཆེ་ཞེས་ཚར་མང་པོར་ལབ་པ་རེད།

ཡང་དགུན་ཁ་ཞིག་ཁ་བ་ཆེན་པོ་ཞིག་བབས་ཏེ་ཤིང་གི་མིའི་ནང་མི་ཚོའི་གཟུགས་པོ་གྲང་ངར་གྱི་ཁྲོད་དུ་འཁྱག་རེངས་སུ་འགྲོ་གྲབ་བྱེད་དུས། ཤིང་གི་མིས་ཁོའི་གཟུགས་པོའི་སྟེང་ནས་ཤིང་དུམ་བུ་མང་པོ་ཞིག་གཏུབས་ཏེ་མེ་ལ་བསྲེགས་ནས་ཁོའི་ནང་མི་ཚོའི་སྲོག་སྐྱོབ་ཐབས་བྱས། ཤིང་གི་མིས་དེ་ལྟར་གནམ་གཤིས་གྲང་མོ་ཡིན་པའི་ཉི་མ་མང་པོ་ཞིག་ལ་ཁོའི་ལུས་སྟེང་ནས་ཤིང་གཞོགས་ཏེ་མེ་སྤར་ནས་ཁོའི་ནང་གི་ཚོའི་གཟུགས་པོ་དྲོས་ཐབས་བྱས་པས། ལྷ་སར་བསླེབས་པའི་དུས་དེར་ཤིང་གི་མིའི་གཟུགས་པོ་ཧ་ཅང་ཆུང་ཆུང་ཞིག་ལས་ལྷགས་མེད་པ་རེད།

དེ་ལྟར་ཤིང་གི་མིའི་ནང་མི་ཚོས་རི་ཆུ་མང་པོ་ཞིག་བརྒལ་ནས་ལྷ་སར་བསླེབས་ཤིང་། ལྷ་ས་ནས་ཇོ་བོ་ཡིད་བཞིན་ནོར་བུ་སོགས་རྟེན་རྩ་ཆེན་མང་པོ། པོ་ཏ་ལ་དང་སེ་འབྲས་དགེ་གསུམ་སོགས་དགོན་པ་མང་པོར་མཇལ་ཁ་བྱིན་རླབས་འདོད་པ་ཚིམ་པ་ཞིག་ཞུས་པ་རེད། ཉི་མ་གཅིག་ཁོ་ཚོ་འབྲས་སྤུངས་དགོན་པར་མཆོད་མཇལ་དུ་འགྲོ་དུས། འབྲས་སྤུངས་ཚོགས་ཆེན་མར་གྲོལ་ཡོང་བ་དང་ཁེལ་པས། གྲྭ་པ་སྟོང་ཕྲག་མང་པོ་ཞིག་འུར་ཆེམ་ཆེམ་ཕེབ་ཡོང་བ་དང་། ཤིང་གི་མིའི་ནང་མི་ཚོ་ལམ་གྱི་ཟུར་ཞིག་ཏུ་འགྲེངས་ནས་བསྡད་པ་རེད། སྐབས་དེར་གྲྭ་པ་ཆུང་ཆུང་ཞིག་གིས་མིག་ནས་མཆི་མ་བཞུར་བཞིན་ཁོ་ཚོའི་འཁྲིས་ནས་འགྲོ་གི་ཡོད་པ་དེ་ཤིང་གི་མིས་མཐོང་བ་དང་། ཁོས་གྲྭ་པ་ཆུང་ཆུང་དེ་ངུ་དགོས་པའི་རྒྱུ་མཚན་དྲིས་པས། གྲྭ་ཆུང་དེས་ཁོས་རང་ལ་ཤིང་གི་ཕོར་པ་སྙིང་རྗེ་བོ་ཞིག་ཡོད་པ་དེ་བརླགས་སོང་བས། སང་ཉིན་ཚོགས་པ་འཚོགས་དུས་ཇ་འཐུང་སྤྱད་དང་རྩམ་པ་བཟའ་སྤྱད་མེད་པར་སེམས་ཁྲལ་ཆེན་པོ་བྱེད་ཀི་ཡོད་ལུགས་བརྗོད་པ་རེད། དེ་ནས་ཤིང་གི་མི་དེས་གྲྭ་པ་ཆུང་ཆུང་དེ་སྙིང་རྗེས་ནས་ཁོ་ཁྲིད་དེ་ཤིང་བཟོ་ཞིག་གི་རྩ་ལ་སོང་སྟེ། ཤིང་གི་མི་ཁོ་རང་གི་གཟུགས་པོ་ཆུང་ཆུང་དེས་གྲྭ་པ་ཆུང་ཆུང་དེ་ལ་ཤིང་ཕོར་ཞིག་བཟོ་རོགས་ལབ་པ་རེད། སྐབས་དེར་ཤིང་གི་མིའི་ནང་མི་ཚང་མ་དང་ཁྱད་པར་དུ་ཕྲུ་གུ་ཆུང་ཆུང་དེ་སེམས་པ་ཧ་ཅང་སྐྱོ་བོ་བྱུང་བ་རེད། དེ་བཞིན་ཤིང་གི་མིའི་སེམས་པ་ཡང་སྐྱོ་བོ་བྱུང་བ་རེད། ཡིན་ན་ཡང་ཤིང་གི་མིས་ཁོའི་ནང་མི་ཚོར། ང་ཚོ་ཐག་རིང་པོ་ནས་དཀའ་ལས་བརྒྱབ་སྟེ་ལྷ་སར་ཇོ་བོ་རིན་པོ་ཆེ་མཇལ་དུ་ཡོང་བའི་དོན་དག་ཚང་མ་འགྲུབ་སོང་བ་རེད། ད་ནི་ང་རང་གྲྭ་པ་ཆུང་ཆུང་འདིའི་ཕོར་པ་ཞིག་ཏུ་གྱུར་ནས་འབྲས་སྤུངས་དགོན་པར་འདུག་འདོད་ཡོད་པས། ཁྱེད་ཚོས་མཆོད་མཇལ་བྱས་ཚར་རྗེས་ག་ལེར་རང་ཡུལ་ལ་ཕེབས་རོགས་གནང་ཞེས་བརྗོད་པས། ཕྲུ་གུ་ཆུང་ཆུང་དེས་ཤིང་གི་མིའི་ལག་པ་ཆུང་ཆུང་དེར་འཇུས་ནས། ཇོ་ཇོ་ཤིང་གི་མི་ལགས། ངས་ནམ་ཡང་ཁྱེད་ཀྱིས་ང་ལ་བཅངས་པའི་བརྩེ་བ་དེ་བརྗེད་ཀྱི་མིན། ང་ཡང་ཆེན་པོ་ཆགས་ན་ཁྱེད་རང་ནང་བཞིན་མི་གཞན་ལ་རོགས་པ་བྱེད་ཀི་ཡིན་ཞེས་ལབ་པ་རེད།

དེ་ནས་ཤིང་བཟོ་དེས་ཤིང་གི་མིའི་གཟུགས་པོ་བེད་སྤྱད་དེ་གྲྭ་པ་ཆུང་ཆུང་དེ་ལ་ཤིང་གི་ཕོར་པ་སྙིང་རྗེ་བོ་ཞིག་བཟོས་པ་དང་། གྲྭ་པ་ཆུང་ཆུང་དེས་ཀྱང་ཤིང་གི་ཕོར་བ་ཆུང་ཆུང་དེ་ཁོའི་མི་ཚེ་ཆ་ཚང་ལ་ཇ་འཐུང་བ་དང་རྩམ་པ་བཟའ་བ་སོགས་ལ་བེད་སྤྱད་བཏང་བས། ཤིང་གི་མི་ཡང་གྲྭ་པ་དེ་དང་མཉམ་དུ་མི་ཚེ་སྐྱིད་པོ་ཞེ་དྲགས་བྱུང་བ་རེད།

ཤིང་གི་མིའི་སྒྲུང་དེ་མཚམས་འདི་ནས་མཇུག་རྫོགས་སོང་བ་རེད། གྲོགས་པོ་ཆུང་ཆུང་ཁྱེད་ཚོས་ཀྱང་ཤིང་གི་མི་དེ་ནང་བཞིན་རང་གི་ཡོད་ཚད་བློས་བཏང་ནས་མི་གཞན་ལ་རོགས་རམ་བྱེད་འདོད་ཡོད་དམ། ཁྱོད་ཚོས་ཤིང་གི་མིའི་སྒྲུང་འདི་ཁྱོད་ཚོའི་མི་ཚེ་གང་བོར་སེམས་ནང་ཉར་ན་ཡང་འགྲིག་གི་རེད། གལ་སྲིད་ཉི་མ་གཅིག་ཁྱོད་ཚོ་ལྷ་སར་ཕྱིན་ཏེ་འབྲས་སྤུངས་དགོན་པར་ཕྱིན་པ་ཡིན་ན། ཁྱོད་ཚོ་ཤིང་གི་མིའི་གཟུགས་པོ་ཡིས་བཟོས་པའི་ཤིང་གི་ཕོར་པ་ཆུང་ཆུང་དེག་མཐོང་ཐུབ་ན་ཡང་ཐང་ལ། དེ་དུས་ཁྱོད་ཚོས་ཇོ་ཇོ་ཤིང་གི་མི་དེའི་གཞན་ཕན་གྱི་ལྷག་བསམ་དང་རང་ཉིད་གཞན་དོན་དུ་བེད་སྤྱོད་བྱེད་པའི་སྤོབས་པ་ཆེན་པོ་དེ་ཚོ་ངེས་པར་དུ་སེམས་ནང་དྲན་དགོས་ཀྱི་རེད།