༄༅།། རི་བུང་དང་ཝ་མོ།

ཉིན་ཞིག་རི་བོང་གིས་གལ་ཏེ་ཐབས་ཤེས་ཤིག་མ་བྱས་ན་ཕྲུ་གུ་རྣམས་ཝ་ངན་དེས་ཟོས་ནས་ཚར་འགྲོ་ངེས་རེད་ཅེས་བསམ་སྟེ། ཝ་འགྲོ་ལམ་དུ་མིག་ཡ་གཅིག་ཟུམ་ནས་གྲོ་སྐམ་ཟ་བཞིན་བསྡད། ཝ་དེས་རི་བོང་གིས་ཁ་མུར་མུར་ངང་ཅི་ཞིག་ཟ་བཞིན་པ་མཐོང་འཕྲལ་གམ་དུ་སོང་ནས་ན་རེ། རི་བོང༌། རི་བོང༌། ཁྱོད་ཀྱིས་ཅི་ཞིག་ཟ་བཞིན་ཡོད་ཅེས་དྲིས། རི་བོང་གིས་སྔར་བཞིན་མིག་ཡ་གཅིག་ཟུམ་ནས། ངས་ང་རང་གི་མིག་རིལ་ཟ་བཞིན་ཡོད་ཅེས་ལན་བཏབ། ཝ་མོ་ན་རེ། ང་མ་སོང་བའི་ས་ཆ་ཞིག་མེད་ལ། མ་ཟོས་པའི་ཟས་རིགས་ཞིག་མེད་མོད། རང་གི་མིག་རིལ་ཟ་བ་ཞིག་ཐོས་མ་མྱོང༌། རི་བོང་གིས་སྔར་བཞིན་མིག་ཡ་གཅིག་ཟུམ་ནས་གྲོ་སྐམ་ཟ་བཞིན་བསྡད།

ཝ་མོའི་སེམས་ལ་རི་བོང་ལ་གསང་བ་ཞིག་ཡོད་ཁོ་ཐག་རེད་སྙམ་ནས་ན་རེ། སྐུ་ཞབས་རི་བོང༌། ངེད་གཉིས་གྲོགས་པོ་བློས་ཐུབ་ཡིན་ཟེར་ན་ཡང་མི་ཆོག་རྒྱུ་མེད། ཁྱོད་ལ་གཏམ་བཟང་རེ་ཡོད་ན་ང་ལ་མ་གསང་རོགས་ཞེས་བཤད། རི་བོང་གིས་སྐེ་འཁྱོགས་ནས་ཡུག་ཙམ་ལ་བསམ་བློ་ཞིག་བཏང་རྗེས། འཇིག་རྟེན་ན་མིག་རིལ་ལས་ཞིམ་པའི་ཟས་ཤིག་ག་ལ་ཡོད། མིག་རིལ་གྱི་བྲོ་བ་མཆོག་ཏུ་གྱུར་བ་མ་ཟད། དེ་ཟོས་རྗེས་ཉིན་བདུན་གསུམ་ཉེར་གཅིག་ལ་ཟས་ཟ་མི་དགོས་ཞེས་བརྗོད།

ཝ་མོ་ན་རེ། འོ་ན། མིག་རྡོ་བླངས་རྗེས་ལོང་བར་གྱུར་ན་ཅི་བྱེད་ཅེས་དྲིས། རི་བོང་ན་རེ། གླེན་པ། སྐྲ་དང་སེན་མོ་ལ་སོགས་ཀྱང་ལུས་ཀྱི་ཆ་ཤས་སུ་གྱུར་བ་མ་ཡིན་ནམ། དེ་དག་བཅད་རྗེས་སླར་ཡང་སྐྱེས་རྒྱུ་ཡོད་པ་ལ། མིག་རིལ་ཡང་སླར་ཡང་སྐྱེ་རྒྱུ་ལོས་ཡོད། གནད་འགག་ནི་སེམས་ཅན་གྱིས་དེའི་མན་ངག་མི་ཤེས་པར་ལན་ཟེར། ཝ་མོས་འགྲམ་ཆུ་ལྡང་བཞིན་ན་རེ། ཁྱོད་ཀྱིས་དེའི་མན་ངག་ཤེས་སམ་ཞེས་དྲིས། རི་བོང་གིས་སྐད་མགོ་ཇེ་དམའ་རུ་བཏང་སྟེ། ཟླ་འགའི་སྔོན་ལ་ང་རང་དྲང་སྲོང་ཞིག་དང་ཕྲད། ཁོས་ང་ལ་དེའི་སྐོར་གྱི་གདམས་པ་གནང༌། ཡིན་ཡང་གཞན་ལ་བཤད་མི་ཉན་ཟེར་ཞེས་སྨོས།

ཝ་མོས་སེམས་ལ་རི་བོང་འདི་ལ་ཀུན་གྱིས་བློ་ལྡན་ཞེས་འབོད་པ་ཡིན་པས། འདི་ལ་བློ་དང་གདམས་ངག་ཁྱད་པར་ཅན་ཡོད་ལོས་ཆེ། མིག་རིལ་སྐོར་གྱི་མན་ངག་ཅིག་ཀྱང་ཡོད་ཁོ་ཐག་རེད་སྙམ་ནས་མན་ངག་དེ་ང་ལ་བཤད་རོགས་ཞེས་ཞུ་བ་བྱས་མཐར། རི་བོང་གིས་འཐད་མི་འཐད་ངང་ན་རེ། ང་ཡིས་ཁྱོད་བུ་རྒོད་ཅིག་ཡིན་པར་བལྟས་ནས་ཁྱོད་ལ་བཤད་ཡ། ཡིན་ཡང་སྔོན་ན་མིག་རིལ་ཟོས་རྗེས། ཕྱིར་ཁྱོད་ཚང་ལ་སོང་ནས་ཆོ་ག་ཐུང་ཐུང་ཞིག་བསྒྲུབས་ནས། ད་གཟོད་མན་ངག་བཤད་ཆོག་ཟེར།

ཝ་མོ་དགའ་ནས། ཡོང་ཚད་རི་བོང་ཁྱོད་ཀྱི་ཁ་ཐོག་ལ་འཇོག་ཡ། སྔོན་ན་ང་ཡི་མིག་རིལ་ངའི་ཁ་ནང་དུ་ཞོག་ཟེར། རི་བོང་གིས་ཝ་མོའི་མིག་རིལ་དྲུས་ནས་པར་ལ་གཡུགས་ཤིང༌། རུམ་ནས་སྔ་མོ་ནས་གྲ་སྒྲིག་བྱས་ཡོད་པའི་གྲོ་མ་སྐམ་པོ་སྦྲང་རྩིས་སྦངས་པ་ཞིག་ཝ་ཡི་ཁ་ནང་དུ་བཞག

ཝ་རྒན་གྱིས་ཟོས་རྗེས་ན་རེ། ཨ་ལ་ལ། ཟས་འདི་འདྲའི་ཞིམ་པོ་ཞིག་ང་ཡིས་གཏན་ནས་ཟོས་མ་མྱོང༌།རི་བོང་རི་བོང༌། མིག་རིལ་ཡ་གཅིག་པོ་དེ་ཡང་ང་ཡི་ཁ་ནང་དུ་ཞོག་ཟེར། རི་བོང་ན་རེ། ཁོ་རེ། གྲོགས་པོ། མིག་རིལ་འདི་ཟས་རང་ག་བ་ཞིག་མིན་པར། ཡ་གཅིག་ཟོས་ཚེ་ཉིན་ཉེར་གཅིག་ལ་ཟས་ཟ་མི་དགོས། ད་དུང་གཞན་པ་དེ་ཡང་ཟའམ་ཞེས་དྲིས་ཝ་ཡི་སེམས་ལ་མིག་རིལ་འདྲུ་དུས་ཅུང་ན་ཟུག་ཡོད་མོད། སླར་ཡང་སྐྱེས་རྒྱུ་ཡོང་ན་ཟས་འདི་འདྲ་ཞིམ་པོ་ཞིག་ཅི་ལ་མི་ཟ་སྙམ་ནས་
མིག་རིལ་གཞན་དེ་ཡང་ཟ་རྒྱུ་ཞེས་བརྗོད།

རི་བོང་གིས་ཝ་ཡི་མིག་རིལ་གཞན་པ་དེ་ཡང་དྲུས་ནས་དེའི་ཁ་ནང་དུ་བཞག ཝ་ན་རེ། རི་བོང༌། རི་བོང༌། ང་ཐེངས་ཀྱི་འདི་བཅའ་རེ་བཅིར་རེ་ཞིག་ཡིན་དོན་ཅི་ཞེས་དྲིས། རི་བོང་ན་རེ། ཟོས་ཟོས་རྔ་མ་བཅིར་བཅིར་ཟེར་བ་རེད་ཅེས་སྨོས།

དེ་ནས་རི་བོང་གིས་ཕྱིར་ཡུལ་དུ་སོང་ནས་མིག་རིལ་སྐྱེས་སུ་འཇུག་པའི་མན་ངག་བཤད་ཟེར་ནས་ཝ་མོ་ཁྲིད་དེ་ལམ་ལ་ཆས། བྲག་ཐེམ་གཟར་མོ་འདབས་ན་གཙང་ཆུ་ཆེན་པོ་བཞུར་བཞིན་པ་ཞིག་གི་སྟེང་ནས་རི་བོང་ན་རེ། ཨ་ཁུ་ཝ། དེད་གཉིས་ཀྱིས་འདི་ནས་ངལ་གསོ་ཞིག་བྱ་ཨེ་ཟེར་ནས་མེ་སྒོང་ཆེན་པོ་ཞིག་བརྒྱབ་ཅིང༌། ཝ་ཐེམ་གའི་ཁ་རུ་སྡོད་དུ་བཅུགརེ་ཞིག་ནས་རི་བོང་ན་རེ། ཨ་ཁུ་ཝ། ཨ་ཁུ་ཝ། ཕྱིར་ལ་བཀྱེད་དང་གྱ་ཁ་ཡག་པོ་མེས་འཚིག་ཐལ་ཞེས་བཤད། ཝ་ཕྱིར་བསྣུར་ཞིག་བྱས།

རི་བོང་གིས་མེ་ཆེར་བུས་ནས་ཝ་མོའི་ངོ་གདོང་ཚ་ལམ་ལམ་བྱས།རི་བོང་ན་རེ། ཨ་ཁུ་ཝ། ཨ་ཁུ་ཝ། ཕྱིར་ལ་བཀྱེད་དང༌། གྱ་ཁ་ཡག་པོ་མེ་ཡིས་འཚིག་ཐལ་ཟེར། ཝ་ཡང་ཕྱིར་བསྣུར་ཞིག་བྱས། རི་བོང་གིས་མུ་མཐུད་དུ་མེ་སྒོང་སྟེང་བུད་ཤིང་མང་པོ་བསྣན་ཏེ་སླར་ཡང་སྐད་ཆེན་་པོས་ན་རེ། ཨ་ཁུ་ཝ། ཨ་ཁུ་ཝ། ཕྱིར་བཀྱེད་དང་གྱ་ཁ་ཡག་པོ་མེ་ཡིས་འཚིག་ཐལ་ཞེས་སྨོས། ཐེངས་འདིར་ཝ་ཕྱིར་བསྣུར་བྱས་པ་ཙམ་གྱིས་ཅལ་སྒྲ་དང་བཅས་ཐེམ་ག་ལས་དྲག་ཏུ་བཞུར་བའི་གཙང་ཆུར་ལྷུང་ཞིང་སྐྲག་མ་
དངངས་ཀྱིས་གཙང་འགྲམ་གྱི་ལྕང་སྡོང་ཞིག་ལ་སོ་བཏབ་ནས་བསྡད། རི་བོང་གིས་མཐོང་ནས་ན་རེ། ཨ་ཁུ་ཝ། ཨ་ཁུ་ཝ། ཁྱོད་ཕ་བཟང་གི་བུ་ཡིན་ཚེ་ཨ་ཞེས་བརྗོད་དང་ཟེར་བས། ཝ་མོའི་སེམས་ལ་ང་ཕ་བཟང་གི་བུ་ལོས་ཡིན་སྙམ་ནས་ཨ་ཞེས་བརྗོད་ནས་ཁ་གདངས་མ་ཐག་ལྕང་མ་ཁ་ནང་ནས་ཤོར་ཏེ་ཝ་ཡང་གཙང་ཆུས་ཁྱེར་སོང༌།