དེ་ཡང་སྔོན་ཞིག་གི་དུས་ན། ཕ་མ་གཉིས་སྔ་མོ་ནས་ཚེ་ལས་འདས་པའི་དྭ་ཕྲུག་གཉིས་ཡོད། ཕུ་བོ་ནི་ཆུང་དུས་ནས་རྒྱུ་ངོ་ལས་སྤུན་ངོ་མི་ཤེས་པའི་མི་སེམས་ནག་ཅིག་ཡིན། ནུ་བོ་ནི་ངང་རྒྱུད་འཇམ་ཞིང་སྙིང་རྗེ་ཆེ་ལ། དུས་རྒྱུན་པར་སྔ་ལངས་འཕྱི་ཉལ་བྱས་ཏེ་སོ་ནམ་གྱི་ལས་ཁོ་ནར་བརྩོན་པའི་མི་ཡ་རབས་གཞུང་དྲང་ཞིག་ཡིན་རུང་། བུ་ཡི་བཟང་ངན་རང་གི་ལག། ལོ་ཡི་བཟང་ངན་གནམ་གྱི་ལག་ཅེས་པའི་དཔེ་ལྟར། ལོ་ངོ་དུ་མར་ཐན་སྐྱོན་བྱུང་བས་རིམ་བཞིན་སྦྲང་ཁྱིམ་ཞིག་ཏུ་གྱུར་སོང་།

ལོ་ཞིག་གི་དཔྱིད་ཀར་ནུ་བོ་ཚང་ལ་ས་བོན་མེད་པས་ཕུ་བོ་ཚང་ལ་ལས་བོན་བསྐྱི་རུ་སོང་བ་ཕུ་བོས་འདི་སྐད་དུ། ས་བོན་བསྐྱི་དགོས་ན་སྔོན་ལ་ངའི་ཞིང་ཐོབས་ཟེར། ནུ་བོས་དེ་ལོས་ཆོག་ཅེས་སོང་ནས། ཕུ་བོ་ཚང་གི་ཞིང་འདེབས་སྐབས། ཞིང་ནང་ནས་སྐྱི་ཁུག་རྙིང་བ་ཞིག་རྙེད། ནུ་བོས་སྐྱི་ཁུག་ལག་ཏུ་བཟུང་ནས་འདི་སྐད་དུ། འདིའི་ནང་ན་རྩམ་པ་བཀང་ཡོད་ན་སྐྱིད་པ་ལ་ཞེས་བཤད་པ་ན། གློ་བུར་དུ་སྐྱི་ཁུག་ནང་རྩམ་པས་བཀང་ཡོང་།

ནུ་བོ་ཡ་མཚར་ཏེ་སྐྱི་ཁུག་འདི་ཅི་ཡིན་ནམ་བསམས་ཞོར་ཡང་། མ་ལོག་ཅིག་ཡོད་ན་དགའ་བ་ལ་ཞེས་བཤད་རྗེས། གློ་བུ་དུ་སྐྱི་ཁུག་ནང་ནས་མར་ལོག་ཅིག་ཡོང་། དེ་ནས་ནུ་བོས་སྐྱི་ཁུག་དེ་ནི་དགོས་འདོད་ཐམས་ཅད་གནང་བའི་ནོར་བུ་ཞིག་ཡིན་པ་ཤེས་ཏེ། ཁྱིམ་དུ་ཁྱེར་ཡོང་ནས་བདག་གཉེར་བྱས།

ཉིན་ཞིག་ཕུ་བོས་ཤེས་ཏེ་ནུ་བོ་ཚང་ལ་ཤོར་ཡོང་ནས་འདི་སྐད་དུ། ངའི་ཞིང་ནང་གི་རིན་པོ་ཆེ་ང་ལ་དབང་དགོས། ཞེས་ནུ་བོའི་ཁྱིམ་གྱི་སྐྱི་ཁུག་བཙན་གྱིས་འཕྲོགས་རྗེས། སེམས་ནས་སྐྱི་ཁུག་འདི་ཡོད་ཚེ། འཇིག་རྟེན་འདིར་ང་ལ་འགྲན་བཟོད་པའི་ཕྱུག་པོ་ཞིག་མེད་དོ་ཞེས་བསམས་ཏེ་འདི་སྐད་དུ། ང་ལ་འབྲུ་རིགས་གྲོ་ནས་སྲན་གསུམ་གྱི་རི་བོ་མཐོན་པོ་ཞིག་སྤུངས་དགོས་ཞེས་བཤད་པ་ན། གློ་བུར་དུ་འབྲི་རིགས་ཀྱི་རི་བོ་ཆེན་པོ་ཞིག་གྲུབ་པ་དང་། འབྲི་རིགས་ཀྱི་རི་བོ་མཐོ་དྲགས་པས། ཉིལ་ཡོང་ནས་ཕུ་བོ་འབྲུ་རིགས་འོག་ཏུ་བཅུག་ནས་ཤིའོ།