༅། ། གཡག་རྒོད་ཀྱི་ལོ་གཅིག་གི་སྙན་ཐོ་དང་མདུན་སྐྱོད་ཀྱི་འཆར་གཞི།

གཡག་རྒོད་ནི་ཉིས་སྟོང་བཅུ་གཅིག་ལོའི་སྤྱི་ཟླ་བདུན་པའི་ཚེས་དྲུག་ཉིན་ང་དང་ངའི་བཟའ་ཟླ་ཇོས་ལེས་གཉིས་ཀྱིས་ཁ་ན་ཊའི་ནང་དུ་བོད་ཀྱི་བྱིས་པའི་སློབ་གསོ་རྒྱུན་འཛིན་དང་དར་སྤེལ་ལ་དམིགས་ཏེ་གསར་འཛུགས་བྱས་པ་དང་ཆབ་གཅིག་གཡག་རྒོད་དྲ་ཚིགས་དབུ་འབྱེད་མཛད། གཡག་རྒོད་ནི་བོད་ཀྱི་བྱིས་པའི་སློབ་གསོ་རྒྱུན་འཛིན་དང་གོང་སྤེལ་གྱི་བྱ་བཞག་གཙོ་གཉེར་བྱེད་པའི་དང་བླངས་སྲི་ཞུའི་ལས་ཁུངས་ཆུང་ཆུང་ཞིག་ཡིན། གཡག་རྒོད་ཞབས་ཞུའི་ངོ་བོ་བོད་ཀྱི་བྱིས་པའི་སློབ་གསོ་གོང་འཕེལ་གྱི་རྒྱུ་ཆ་གསར་སྐྲུན་དང་ཞབས་ཞུའི་ལས་རིགས་གསར་འཛུགས་ཀྱི་ལས་དོན་བརྒྱུད་དེ་ཐད་ཀར་སྤྱི་ཚོགས་ཀྱི་དགོས་མཁོ་བསྐྲུན་རྒྱུ་དེ་ཡིན།
འདས་པའི་ལོ་གཅིག་དང་ཟླ་གཉིས་ཀྱི་ནང་དུ་ལས་དོན་གཙོ་བོ་བྱིས་པ་ལོ་གསུམ་ནས་བརྒྱད་ཅན་ལ་དམིགས་ཏེ་བོད་ཀྱི་དམངས་ཁྲོད་བྱིས་སྒྲུང་། ང་རྒྱལ་གྱི་འབྲས་བུ། རྨ་བྱ་དང་ཁྭ་ཏ། ཁྱི་དང་བྱི་ལའི་རྩོད་གླེང་། ར་མ་བློ་གྲོས་ཅན་དང་སྤྱང་ཀི། རྒྱུ་ནོར་གྱི་མནར་གཅོད། ཟ་རྔམ་ཅན་གྱི་སྤྱང་ཀི། འུད་ཤོབ་ཆེ་བའི་བྱི་ལ། གཡོ་རྒྱུ་ཆེ་བའི་བྱི་ལ། སྟག་ཞོན་སྤྲུལ་ལྕགས། ཚོང་བ་གླེན་པ་དང་རྐུན་མ་སྤྱང་བོ། གཞུང་དྲང་བུ་མོ། ཁ་མིག་དང་རྣ་ཅོག མ་མོ་མ་བུ་གསུམ་དང་སྤྱང་ཁུ། ཆིག་སྒྲིལ་ནི་སྟོབས་ཤུགས་ཡིན། སྡོམ་དང་རྒྱལ་པོ། སྤྱང་གྲུང་ལྡན་པའི་སྤྱང་ཀི། བསམ་ཤེས་མེད་པའི་གྲོགས་པོ་གསུམ། བློ་རིག་ལྡན་པའི་སྤལ་པ། བསམ་མི་ཤེས་པའི་ར་མའི་ལས་དབང་སོགས་དམངས་ཁྲོད་ཀྱི་བྱིས་སྒྲུང་༢༠་ཙམ་བསྡུ་བསྒྲུགས་བྱས་པ་དང་། བྱིས་སྒྲུང་དེ་དག་ལ་བོད་རང་གི་ཡུལ་སྲོལ་གོམས་གཤིས་ལྟར་རི་མོ་བྲིས་ཏེ་དྲ་ལམ་ནས་བོད་ཕྱི་ནང་གི་ཕ་མ་དང་བུ་ཕྲུག་ལ་ཞབས་ཞུ་བསྒྲུབས་ཁུལ་བྱས།

གཞན་དྲ་གནས་འདི་བརྒྱུད་དེ་དེང་རབས་བོད་ཀྱི་མཁས་པས་བྲིས་པའི་བྱིས་སྒྲུང་གསར་རྩོམ། རྒྱལ་ཁབ་གཞན་གྱི་བྱིས་སྒྲུང་གྲགས་ཅན་བོད་བསྒྱུར་བྱས་པ། བོད་ཕྱི་ནང་ནས་བཟོ་སྐྲིན་གནང་བའི་བྱིས་པའི་གཟུགས་མཐོང་བརྙན་འཕྲིན། མཚར་གཏམ་དང་བྱིས་པའི་གླུ་གཞས། ཐ་སྙད་གསར་བ་དང་བོད་ཡིག་སྦྱོང་ས་སོགས་ཚན་པ་བཅུ་ལྷག་གི་ནང་དུ་བསྡུས་ཡོད། ལོ་གཅིག་དང་ཟླ་བ་གཉིས་ཀྱི་ནང་དུ་བོད་མི་ཁྱོན་གཅིག་ཁྲི་སྔ་སྟོང་ལྷག་གིས་གཡག་རྒོད་དྲ་ཐོག་ཏུ་ཕེབས་ནས་ལྟ་ཀློག་གནང་ཡོད།
འདས་པའི་ལོ་གཅིག་རིང་ང་ཚོས་ཞབས་ཞུའི་ལས་རིགས་ཅུང་ཟད་ཞིག་གཉེར་ཐུབ་པའི་མཐུན་རྐྱེན་གཙོ་བོ་ཨ་མདོ་བ་སྡོང་དང་རྨེ་བ་བསོད་ནམས་མགོན་པོ། ཕན་པོ་བསྟན་དར། ཟོག་ཡུལ་གནས་བཞུགས་དགེ་བཤེས་བརྩོན་འགྲུས་རྒྱ་མཚོ། རྨེ་བ་བསྟན་འཛིན་དང་ཁྲོ་ཆུའི་དོན་གྲུབ། ཟོག་ཚང་དགེ་ལེགས་དང་བྲག་དཀར་སྤྲེལ་རྫོང་གི་ཚུལ་ཁྲིམས། དཔའ་ལུང་བསྟན་པ་དང་རྡོ་སྤིས་ཆོས་དཔལ། དབྱིན་ལན་གནས་བཞུགས་རྔ་རྒོད་ཡོན་ཏན་དང་གླུ་བ་མགོན་པོ་དོན་གྲུབ། ཇོས་ལེས་དང་ཁོང་གི་སྤུན་སུ་ཊ་སྤུ་སོགས་ཀྱི་ཕྱོགས་མང་བོ་ནས་རྒྱབ་སྐྱོར་གནང་བའི་འབྲས་བུ་ཁོ་ན་ཡིན་པས། ཁོང་རྣམ་པ་ཚོར་སྙིང་ནས་བཀའ་དྲིན་ཆེ་ཞུ།

གཞན་བུད་མེད་རྩོམ་པོ་གཟུངས་ཕྱུག་སྐྱིད་ཀྱིས་ཟ་རྔམ་ཅན་གྱི་སྤྱང་ཀི་ཞེས་པའི་བྱིས་སྒྲུང་ཞིག་བསྡུ་བསྒྲིགས་བྱས་ནས་ང་ཚོར་བསྐུར་གནང་བ་དང་། སྙན་ངག་པ་ཨ་ལགས་ཀླུ་སྨྱོན་ཚང་གིས་ང་ཚོའི་རེ་སྐུལ་ལྟར་ཤིང་གི་མི་ལྷར་སོང་བ་ཞེས་པའི་བྱིས་སྒྲུང་ཞིག་བྲིས་ཏེ་ང་ཚོར་བསྐུར་གནང་བྱུང་། སྐུ་ཞབས་བསོད་ནམ་རྒྱ་མཚོ་ལགས་ཀྱིས་ཁོང་རང་གིས་བསྒྱུར་བའི་ཡོ་རོབCzechརྒྱལ་ཁབ་ཀྱི་གནའ་སྒྲུང་ཞིག་བསྐུར་གནང་བྱུང་བས། ཁོང་རྣམ་པ་ཚོར་ཐུགས་རྗེ་ཆེ་ཞུ་རྒྱུ་ཡིན།
གཡག་རྒོད་གསར་འཛུགས་བྱས་ནས་ད་བར་གྱི་འགྲོ་སོང་ཙག་ཙིག་ཡོད་པ་ཐམས་ཅད་རང་ཉིད་སྒེར་གྱིས་བཏང་བ་ལས་། དཔལ་འབྱོར་སྐར་གང་གི་ཐོན་ཁུངས་བསལ་མེད། ཡིན་ནའང་། ཁ་ན་ཊའི་གྲོང་ཁྱེར་ཊོ་རན་ཊོར་གནས་བཞུགས་བུ་མོ་ཆོས་ཉིད་ཀྱིས་ཁ་སྒོར ༢༠ ཞལ་འདེབས་སུ་བཙན་གྱིས་གནང་བྱུང་བ་དང་སྒོར་དེ་དག་མ་འོངས་གཡག་རྒོད་ཀྱི་མ་རྩ་ལ་དམིགས་ཏེ་བཟུང་བསྡད་ཡོད།
ད་དུང་ཡང་གཡག་རྒོད་ཀྱི་དངོས་ཡོད་གནས་སྟངས་ནི་བུ་བཅོལ་ཁང་དུ་ཡོད་པའི་བྱིས་པ་ཞིག་གི་ངང་ཚུལ་དང་འདྲ་བོ་ཡོད། འོན་གྱང་གཡག་རྒོད་འཇིག་རྟེན་འདིར་སྐྱེ་དགོས་པའི་དམིགས་ཡུལ་ནི། ཁོ་རང་དང་འདྲ་བའི་བོད་ཀྱི་བྱིས་པ་ཆུང་ཆུང་ཚོར་ཤེས་རིག་སློབ་གསོའི་ཞབས་ཞུ་ཆུང་ཆུང་ཞིག་བསྒྲུབ་ཆེད་ཡིན་པ་རེད། དེ་ན་གཡག་རྒོད་རང་གི་དམིགས་ཡུལ་ལྟར་མདུན་སྐྱོད་ཀྱི་ལམ་དུ་ཁྲིད་མཁན་གྱི་ལས་མཁས་པའི་གསོ་སྐྱོང་ནི་ཆེས་གལ་ཆེ་བར་འདོད་དེ། གཡག་རྒོད་རྩོམ་བསྒྲིགས་ཚོགས་ཆུང་ཞིག་གསར་འཛུགས་བྱ་རྒྱུ་ཐག་བཅད་པ་ཡིན་ལ། སྤྱི་ཚོགས་ནང་དུ་གདེངས་འཇོག་ཡོད་པ་དང་བྱིས་པའི་སློབ་གསོ་གོང་སྤེལ་གྱི་ལས་དོན་ལ་དམིགས་བསལ་ཉམས་མྱོང་ཕུན་སུམ་ཚོགས་པ་ཡོད་པའི་མི་སྣ་འགའ་དང་ལྷན་དུ་གཡག་རྒོད་ཀྱི་མ་འོངས་མདུན་སྐྱོད་ཀྱི་ལས་དོན་བསྒྲུབ་ཕྱོགས་གླེང་མོལ་བྱེད་བཞིན་པའི་སྐབས་སོ།
གཡག་རྒོད་དྲ་གནས་དབུ་འབྱེད་བྱས་ཏེ་ལོ་གཅིག་དང་ཟླ་བ་གཉིས་ཀྱི་ནང་དུ། གཡག་རྒོད་བོད་ཀྱི་བྱིས་པའི་སློབ་གསོ་རྒྱུད་འཛིན་གྱི་ལས་དོན་ལ་རྒྱབ་སྐྱོར་གནང་མཁན་དང་སེམས་ཤུགས་སྤར་མཁན་རང་རིགས་ཕོ་མོ་ཚང་མ་ལ་སྙིང་ཐག་པ་ནས་བཀའ་དྲིན་ཞེས་ཨ་མདོ་བ་རྔ་བ་མཁས་གྲུབ་ཀྱིས་༢༠༡༢ ལོའི་སྤྱི་ཟླ ༩ བའི་ཚེས ༡༧ ལ།