སྲོལ་རྒྱན་རྩེད་མོ་ཐེ་གེ
སྲོལ་རྒྱུན་གྱི་བྱིས་པའི་རྩེད་མོ་ཐེ་གེ
ཐེ་གེ་ནི་བོད་ཡུལ་སྟོད་སྨད་བར་གསུམ་ཀུན་ལ་དར་ཁྱབ་ཆེ་བའི་བྱིས་པའི་རོལ་རྩེད་ཅིག་ཡིན་ཞིང་། བྱིས་པ་རྣམས་ཀྱིས་ཐེ་གེ་རྩེ་བར་སྤྲོ་སྣང་ཆེན་པོ་བྱེད་ཀྱི་ཡོད། ཐེ་གེའི་རྒྱུ་ཆ་ནི་ར་ལུག་གི་རྗེ་ངར་དང་རྐང་མགོ་འབྲེལ་མཚམས་ཀྱི་རུས་པ་རྡོག་རྡོག་དེ་ཡིན་པ་དང་། ར་ལུག་མང་སའི་རོང་འབྲོག་གི་ས་ཁུལ་དུ་ཐེ་གེའི་རྒྱུ་ཆ་འཚོལ་སླ་བ་ཡོད།
ཐེ་གེ་ལ་ངོས་མི་འདྲ་བ་དྲུག་ཡོད་པ་དང་ངོས་རེ་རེས་སེམས་ཅན་མི་འདྲ་བ་རེ་རེ་མཚོན་གྱི་ཡོད། ཐེ་གེའི་ཁ་ཡར་འཁོར་ན་ར་ཐེ་ཡིན། ཐེ་གེའི་ཁ་མར་འཁོར་ན་ལུག་ཐེ་ཡིན། ཐེ་གེའི་གཡས་ཀྱི་ཟུར་ངོས་རྟ་ཐེ་ཡིན། ཐེ་གེའི་གཡོན་གྱི་ཟུར་ངོས་མཛོ་ཐེ་ཡིན། ཐེ་གེ་ཟུར་རྣོ་ས་ནས་ཡར་འགྲེང་ནས་བསྡད་ན་སེང་ཐེ་ཟེར། ཐེ་གེའི་ཟུར་མཉམ་ས་ནས་ཡར་
འགྲེང་ནས་བསྡད་ན་རྔ་མོང་ཟེར། མི་ཚང་ཕལ་ཆེར་ལ་ཐེ་གེ་ཉར་སའི་སྒམ་ཆུང་རེ་ཡོད་ལ་ཐེ་གེ་རྣམས་ལ་ཚོན་སྣ་ཚོགས་བྱུགས་ཏེ་སྙིང་རྗེ་བོ་བཟོས་ཡོད།
ཐོག་མར་རྩེད་མོ་རྩེ་མཁན་གྱིས་མི་ཚང་མར་ཐེ་གེ་ཆ་སྙོམས་ཀྱིས་བགོ་དགོས། དེ་ནས་མི་རེ་རེས་ཐེ་གེ་རེ་ས་ལ་འཕང་སྟེ་གོ་རིམ་རྩོད་དགོས། སེང་ཐེ་བབས་ན་དང་པོ། རྔ་མོང་
གཉིས་པ། རྟ་ཐེ་གསུམ་པ། མཛོ་ཐེ་བཞི་བ། ལུག་ཐེ་ལྔ་བ། ར་ཐེ་དྲུག་པ་ཐ་མ་བཅས་གོ་རིམ་ལྟར་ཐེ་གེ་ས་ལ་གཏོར་ཏེ་རྩེ་དགོས། རྩེ་ཐེངས་རེ་ལ། མི་རེ་རེའི་ལག་ནས་ཐེ་གེ་རེ་རེ་རྩེ་ཆོག་ལ། གཉིས་རེ་དང་གསུམ་རེ། ཡང་ན་ལྔ་རེ་དང་བཅུ་རེ་སོགས་བསྡུས་ཏེ་རྩེ་ཆོག་པ་ཡིན།
ཐེ་གེ་ཕྱུགས་ཟོག་ཡིན་ཁུལ་གྱིས་རི་ལ་བཀྲམ་ཟེར་ཞིང་རྩེད་མཁན་ཕྱུགས་རྫི་ཡིན་ཁུལ་གྱིས་ལྷས་ལ་བསྡུ་ཟེར་སྲོལ་ཡོད།རྩེད་མོ་འགོ་འཛུགས་མཁན་གྱིས་རྩེ་ཐེངས་གཅིག་གིི་ཐེ་གེ་ཡོངས་རྫོགས་ལག་ཏུ་བཟུང་སྟེ་ཤུགས་ཀྱིས་འབའ་འབུར་མེད་པའི་ས་ཁོད་སྙོམ་སའི་རྩེད་ར་ལ་གཏོར་དགོས། དེ་ནས་རིགས་མཐུན་ཐེ་གེ་རྣམས་བཙལ་ནས་མཐེབ་རྡོག་གིས་གཞུས་ཏེ་རྩེ་བ་ཡིན། ར་ཐེ་དང་ར་ཐེ་དང་། ལུག་ཐེ་དང་ལུག་ཐེ། མཛོ་ཐེ་དང་མཛོ་ཐེ། རྟ་ཐེ་དང་རྟ་ཐེ་མཉམ་དུ་བཞག་སྟེ་རྩེ་དགོས།
སྤྱིར་ར་ཐེ་དང་ལུག་ཐེ་མང་བོ་འབབ་པ་དང་། མཛོ་ཐེ་དང་རྟ་ཐེ་དེ་ལས་ཉུང་བ་འབབ། རྔ་མོང་དང་སེང་ཐེ་འབབ་རྒྱུ་ཤིན་ཏུ་ཉུང་། སེང་གེ་རི་དྭགས་ཀྱི་རྒྱལ་བོ་ཡིན་ཟེར་བ་དང་རྔ་མོང་མཐོང་དཀོན་པའི་སྲོག་ཆགས་ཡིན་ཟེར། དེ་གཉིས་གང་རུང་བབས་ཚེ་རྩེ་མཁན་ཚང་མས་ལག་གང་སྔ་བརྩད་དེ་འཕྲོག་རེས་བྱེད་པ་ཡིན། ཐེ་གེ་རྩེ་མཁན་ལ་ཕོ་མོ་དབྱེ་བ་མེད་པར་ཕ་མ་དང་བྱིས་པ།ཕུ་ནུ་མིང་སྲིང་སྤུན་མཆེད་སུ་ཡིན།མི་གྲངས་གཉིས་དང་གཉིས་ཀྱི་ཡན་འཛོམས་ཚེ་
རྩེ་ཆོག
རྩེད་མོ་འདིར་སྒྲིག་ལམ་ཁ་ཤས་ཡོད་པ་ནི། ཐེ་གེ་རྩེད་རར་བཀྲམ་དུས་གཅིག་ལ་གཅིག་འབྱར་བསྡད་ཡོད་ན་རྩེད་སྐལ་ཤོར་བ་ཡིན། གཅིག་ཐོག་ལ་གཅིག་བརྩེགས་ཡོད་ན་རྩེད་སྐལ་ཤོར་བ་ཡིན། ཐེ་གེར་མཐེབ་རྡོག་གཞུ་བའི་སྐབས་སུ་ཐེ་གེ་གཞན་ལ་ཐུག་པ་དང་རེག་པ་ཡིན་ན་རྩེད་སྐལ་ཤོར་བ་ཡིན། དམིགས་འབེན་ལ་ཏག་ཏག་མ་འཁེལ་ན་རྩེད་སྐལ་ཤོར་པ་ཡིན། མཐར་ཐེ་གེ་བསྡུས་པའི་མང་ཉུང་བསྡུར་ཏེ་རྒྱལ་ཁ་འཐོབ་མཁན་གྱིས་ཕམ་ཁ་ཉོ་མཁན་གྱི་ཐོད་དཀྱིལ་དུ་རང་སྐལ་ལས་ཐེ་གེ་ལྷག་མ་བསྡུས་པའི་ཁ་གྲངས་ལྟར་མཐེབ་རྡོག་གི་གཞུ་བ་དང་རྩེད་ཐེངས་དེ་མཇུག་རྫོགས་པ་ཡིན།