wildyaks
Wildyaks
>
༄༅།།བྱིས་པའི་ནུས་རྩལ་ཇི་ལྟར་འབུར་འཇོམས་བྱེད་པ་ཡིན།
༄༅།།བྱིས་པའི་ནུས་རྩལ་ཇི་ལྟར་འབུར་འཇོམས་བྱེད་པ་ཡིན།
ཆུ་ལས་འབར་གྱིས་བསྒྱུར།
བྱིས་པ་ནར་སོན་ནས་ཁོ་ལག་རྒྱས་ཀྱང་།དོན་དག་ཆེ་ཆུང་ཀུན་པོ་ཕ་མར་བརྟེན་པའི་གོམས་གཤིས་འཇགས་པས་ན།ཕ་མ་མང་བོ་ཞིག་ལ་རང་གི་བུ་ཕྲུག་ནི་ནམ་ཡང་ལག་མི་ཆགས་པའི་བྱིས་པ་ཆུང་ཆུང་ཞིག་ལ་ལྟ་བའི་འདུ་ཤེས་ཤིག་གིས་གཅུན་འདུག ཕ་མ་གམ་དུ་ཡོད་དང་མེད་ཀྱིས་བྱིས་པའི་དོན་དག་ལེགས་འགྲུབ་ཡོང་དང་མི་ཡོང་ཐག་གིས་གཅོད་པ་དང་།རང་སྒེར་གྱིས་གནད་དོན་ཐག་གཅོད་དང་དོན་དག་ལེགས་འགྲུབ་འོང་བའི་ནུས་པ་ཉག་ཕྲ་བས་ན།ཕ་མ་ཚོས་རང་གི་སྦྱོར་བ་ལ་ཕྱིར་རྟོག་བྱས་ནས་གཤམ་གྱི་གནད་དོན་འདི་དག་ཡོད་མེད་ལ་ཐུགས་བསམ་བཞེས་རོགས་ཞུ།
ཨ་མ་ཚོས་ཇི་ལྟར་བསྒྲུབ་ན་བྱིས་པའི་ནུས་རྩལ་མང་བོ་ཞིག་འབུར་འཇོམས་བྱེད།ཁྱེད་ལ་གནད་དོན་འདི་དག་ཡོད་དམ་མེད།ཞིབ་ཀྱིས་གཟིགས་རོགས།
གཅིག བྱིས་པའི་ཚབ་ཏུ་བྱ་བ་ཡོད་ཚད་སྒྲུབ་པ།
བྱིས་པར་མིའི་རྩ་བའི་ནུས་རྩལ་འབྱོར་བའི་ན་ཚོད་ལ་སོན་ཡང་།ཕ་མས་རང་གི་བྱིས་པ་ཉེན་ཁར་འཕྲད་སྲིད་པར་སྐྲག་པའམ་བྱིས་པ་དཀའ་ངལ་སྡུག་སྦྱོར་ལས་གཡོལ་ཆེད།ནམ་ཡང་ལག་ཆགས་མི་སྲིད་པའི་བྱིས་པ་ལྟར་བྱ་བ་ཡོད་ཚད་བྱིས་པའི་ཚབ་ཏུ་སྒྲུབ་པ།ཆུང་ས་ནས་ངོ་འཁྲུད་སོ་འཁྲུད་དང་གྱོན་གོས་གྱོན་པ།ཆེ་ས་ནས་ལས་བྱ་དང་ཁྱིམ་ལས་སོགས་ཡོད་ཚད་ཕ་མས་བྱིས་པའི་ཚབ་ཏུ་གྲུབ་པར་མཛད་ཚེ།བྱིས་པའི་མྱོང་བརྒྱུད་ཀྱི་གོ་སྐབས་ཤོར།སྒེར་གྱི་ལག་པ་འགུལ་བའི་སྟོབས་ནི་ཉམ་དམས་སུ་བཏང་བ་ཁོ་ནའོ།།
བྱིས་པའི་ཚབ་ཏུ་དོན་དག་གཅིག་བསྒྲུབས་པ་ནི་བྱིས་པའི་ནུས་རྩལ་འཚར་ལོངས་ཀྱི་གོ་སྐབས་གཅིག་འཕྲོག་པ་ཡིན།དེ་བས་བྱིས་པ་དཀའ་ངལ་དང་འཕྲད་ཡོད་ཚེ།ཕ་མས་འགན་ལྕོགས་ཚབ་སྒྲུབ་བྱེད་རྒྱུ་མ་ཡིན་པར།རོགས་དན་སྣེ་འཁྲིད་ཀྱི་ནུས་པ་ཐོན་དགོས་པ་དེའོ།།
བྱིས་པའི་འཚར་ལོངས་ཆོས་ཉིད་ལ་གཞིགས་ཏེ།ཐབས་དང་ཡུན་གྱིས་ལག་པ་འགུལ་བའི་རང་ནུས་གསོ་སྐྱོང་དགོས།བྱིས་པའི་ལག་པ་འགུལ་བའི་རང་ནུས་དང་རང་བདག་རང་སྲུང་ནུས་པ་གསོ་རྒྱུ་ནི་དུས་ཐུང་ལས་སླ་ཞིག་གཏན་ནས་མིན་པས་ན།ཁྱིམ་བདག་ལ་སྒུག་བཟོད་ཀྱིས་གདེང་དགོས་པ་མ་ཟད།ནམ་ཞར་རང་གི་ལག་ལེན་ལ་འཇུག་དགོས་པའི་རྟིང་སྐུལ་བྱས་ན།ནམ་ཞིག་བྱིས་པའི་རང་འགུལ་ནུས་སྟོབས་རྒྱས་སྲིད་པ་ནི་ཏན་ཏན་ཡིན།རང་གི་ལག་ལེན་ལ་འཇུག་པའི་གོ་སྐབས་ནི་སློབ་སྦྱོང་གི་གོ་སྐབས་རེད་པས།ཕ་མས་སློབ་སྦྱོང་གི་བརྒྱུད་རིམ་བཙན་འཕྲོག་ནི་ཅི་ནས་ཀྱང་མི་འོས་སོ།།
གཉིས། བྱིས་པའི་རེ་འདུན་ཆ་ཚང་ཚད་མེད་དུ་སྐོང་བ།
དེང་སང་གི་ཕ་མ་མང་ཆེ་བར་བྱིས་པ་གཅིག་ལས་མེད་པ་དང་།གཅིག་པུ་ནི་ཁྱིམ་ནང་གི་ནོར་བུ་ལྟ་བུར་ཆགས་ཡོད།དེའི་སྟབས་ཀྱིས་བྱིས་པ་ལ་ཅི་མཁོ་ཐམས་ཅད་ཚད་མེད་དུ་སྟེར་བ་རེད།ཆ་རྐྱེན་མེད་པའི་རེ་འདུན་ཆ་ཚང་ཚད་མེད་དུ་བསྐངས་ན།བྱིས་པའི་ནང་སེམས་ཀྱི་རང་ལྟེ་འདུ་ཤེས་དྲག་ཏུ་བསྐྱེད་ཚེ།བྱིས་པའི་འཚར་ལོངས་ལ་འགལ་རྐྱེན་བཟོ་བ་རེད།
ལས་ཀའི་དཀའ་ངལ་དང་སྒོར་མོའི་བྱུང་བ་ནི་ལས་སླ་མོ་ཞིག་མིན་པ་བྱིས་པར་ཧ་གོ་བར་བྱ་དགོས།འོས་འཚམ་མིན་པའི་དངོས་རྫས་ཀྱི་ཆ་རྐྱེན་བཏོན་ན།ཨ་མས་ཆོད་སེམས་བརྟན་པའི་རྣམ་འགྱུར་གྱིས་དགག་ལན་ལྡོག་དགོས།ངུ་ཤུམ་དང་གཡེར་བག་གིས་བསླུ་བར་མི་བྱེད་པའི་ཐབས་ལྡན་དགོས།གཟེངས་རྟགས་དང་ངལ་རྩོལ་གྱི་རིན་ཚབ་སྤྲོད་པའི་རྣམ་པར་གྱུར་ན་རབ་ཡིན་པར་འདོད།དེས་དཀའ་ལས་མྱོང་ན་འབྲས་བུ་ཐོབ་པ་ལས།ཁོང་ཁྲོ་དང་ངུ་ཤུམ་གྱིས་དམིགས་ཡུལ་ལ་སླེབས་མི་ཐུབ་པའི་གནས་ལུགས་ཤིག་སྟོན་པས་ཡིན།
གསུམ།བྱིས་པར་ཐལ་ཆེ་བའི་སྲུང་སྐྱོབ་བྱེད་པ།
དུས་རྒྱུན་བྱིས་པར་རྨས་ཕོག་རྐྱེན་གྱི་བསམ་ཡུལ་ལས་འདས་པའི་དོན་རྐྱེན་བྱུང་ཚེ།ཨ་མས་རང་གི་ལྟ་རྟོག་གི་གྲིམ་ཚད་མ་འདང་བར་བསམ་མོད། མ་ཡིན་དེ།ལྟ་རྟོག་གྲིམ་དྲག་པའམ་ཐལ་ཆེ་བའི་སྲུང་སྐྱོབ་བྱས་པའི་མཇུག་འབྲས་ཙམ་དུ་ཟད།
བྱིས་པ་དང་བྱིས་པའི་བར་དུ་འགལ་བ་འབྱུང་སྲིད་པ་ནི་སྨྲས་མེད་ཡིན་མོད།ཨ་མས་རྗེས་ཕྱོགས་བྱིས་པ་ག་གེ་མོ་དང་མཉམ་དུ་རྩེ་མི་དགོས་ཞེས་རང་གི་བྱིས་པ་ལ་བཀའ་ཕབ་པ་ནི།བྱིས་པར་ཕན་ཆེད་དུ་ཡིན་མོད།མི་ལ་འགྲོགས་འདྲིས་ཀྱི་སྦྱང་བརྡར་གོ་སྐབས་རྨ་མེད་པ་ཞིག་འཕྲོག་པ་ཡིན།འགལ་རྐྱེན་དང་བར་གེགས་མེད་པའི་འཕེལ་རྒྱས་ནི་དོན་དམ་གྱི་འཕེལ་རྒྱས་ཤིག་མིན་པ་ནང་བཞིན།བར་གེགས་ཀྱིས་ནམ་དུ་ཡང་འཚར་ལོངས་ལ་སྒུལ་ཤུགས་སྩོལ་བ་རེད།བྱིས་པའི་མ་འོངས་འཚོ་བའི་ཁྲོད་ཀྱི་རང་སྲུང་དང་གཞན་བསྟུན་སོགས་ཀྱི་ནུས་རྩལ་རང་རྒྱུད་ལ་འབྱོར་མ་ནུས་པས།དེང་སང་"ལོན་ན་སུམ་ཅུའི་བྱིས་པ་"ཞེས་པ་ཞིག་བྱུང་ཡོད།དེ་ནི་ཕ་མ་དང་རྒན་པའི་རོགས་དན་མེད་ཚེ་རང་ཚུགས་ཐུབ་པའི་ཐག་གཅོད་དང་གདམ་ཀ་བྱེད་པའི་ནུས་པ་མེད་པ་ཅན་གྱི་མི་རྒན་ལ་ཟེར་བ་རེད།བྱིས་པའི་འགྲོ་འདུག་ཉལ་ཆག་ལ་ལྟ་རྟོག་དང་སྲུང་སྐྱོབ་ཐལ་དྲག་པའི་མཇུག་འབྲས་ཡིན་པར་ཡང་བསྙད་པ་རེད།
ཐལ་དྲག་པའི་སྲུང་སྐྱོབ་གློད་ཡངས་སུ་གཏོང་ཐབས།ཐོག་མར།བྱིས་པའི་ལག་པ་གློད་ནས་ཚོད་ལྟ་ལ་འཇུག་པར་རྟིང་སྐུལ་བྱེད་པ་ནི་གནད་འགག་ཡིན།ཁོ་རང་སྒེར་གྱི་ངོས་ནས་དོན་དག་འགྲུབ་པའི་དཔའ་གདེང་ལྡན་པ་ར་སྤྲོད་དགོས།དཔེར་ན།བདེ་འཇགས་ལ་ཁག་ཐེག་ཡོད་པའི་ཆ་རྐྱེན་འོག་ནས།བྱིས་པ་གཅིག་པུས་ཚོང་ཁང་ནས་དངོས་པོ་ཉོ་བ་ལྟ་བུ།
གཉིས་ནས།བྱིས་པའི་ལག་པ་གློད་ནས་རང་ཉིད་དགའ་བའི་དོན་དག་ལ་འཇུག་དགོས།འོན་ཀྱང་བདེ་འཇགས་ལ་ནམ་ཡང་ཁག་ཐེག་ཡོད་དགོས།ཁོའི་མིག་ལམ་གྱི་ཁྱད་མཚར་བའི་དངོས་པོ་མཐའ་དག་ལ་རེག་ཆོག་པ་དང་།ལུས་སེམས་གློད་ནས་ལག་མྱུལ་ཚོད་བཤེར་ཀྱིས་གསར་གཏོད་ནུས་པ་བསྐྱེད་བསྲིང་བ།
བཞི། བྱིས་པས་དོན་དག་སྒྲུབ་སྐབས་བར་ཆད་བཟོ་བ།
"བྱིས་པའི་ལས་ཀ་ཡུན་མི་རིང་"ཞེས་པ་འདི་ནི་བྱིས་པར་དུས་དང་དུས་སུ་བར་ཆད་བཟོ་བའི་ཨ་མ་ཞིག་ཡོད་པ་ལས་བྱུང་བའི་བཤད་སྟངས་ཤིག་ཡིན་པར་སྙམ།བློ་སེམས་གཅིག་སྒྲིམ་དང་སྤྲོ་བ་ཆེན་པོའི་སྟངས་འཛིན་གྱིས་བྱིས་པའི་ཀླད་ཆེན་ཇེ་མྱུར་དང་ཇེ་གསལ།རྟོགས་པ་དང་ཡིད་འཛིན་ནུས་པ་བླ་ལྷག་ཏུ་འཕེར།གལ་ཏེ་ཨ་མས་གློ་བུར་བའི་བར་ཆད་བཟོས་ཚེ།བྱིས་པའི་རིག་ལམ་ཆག་གྲུམ་དང་།བློ་རྩེ་གཅིག་གཏོད་ནུས་པ་བརྡལ་བཤིག་ཏུ་བཏང་བ་ཡིན་གྱི།དུས་ཡུན་གང་འཚམ་ཞིག་ནས་རིག་པ་གྲིམ་པོར་མི་གནས་བའམ་བློ་རྩེ་རྣལ་མར་མ་གནས་པའི་གོམས་གཤིས་ཆགས་འགྲོ་བ་རེད།
ཡིད་རྟོན་དང་རྒྱབ་སྐྱོར་ཤེས་པ།བྱིས་པས་ཕ་མ་ལ་"ང་རང་གིས་ཚོད་ལྟ་བྱེད་འདོད།"ཅེས་བཤད་ཚེ།བྱིས་པའི་གཉུག་གཤིས་ཀྱི་རང་ཚུགས་སྒེར་གཤིས་ཕྱིར་མངོན་པ་ཡིན་པས།ཨ་མས་བྱིས་པའི་རེ་འདོད་ལ་གཙི་བཀུར་བྱ་འོས་པ་མ་ཟད་ལྷོད་ཀྱིས་ལྟ་རྟོག་བྱེད་ཤེས་དགོས།བྱིས་པ་དཀའ་ཁག་ལ་འཕྲད་ནས་རོགས་དན་མཛད་པའི་རེ་བ་ཞུས་ཚེ་སྣེ་སྟོན་བྱེད་མཁས་དགོས།
གལ་ཏེ་བྱིས་པས་དོན་དག་གྲུབ་པའི་སྤྲོ་བ་ཕ་མ་ལ་བཤད་པའི་ཚེ།བཟང་བསྟོད་བྱེད་མཁས་དགོས།སྐུལ་ལྕག་གི་ངག་ཚིག་གིས་བྱེ་བྲག་ལ་བསྟོད་བསྔགས་བྱེད་ཐུབ་པར་གཞོལ་དགོས།ཨ་མའི་ཁག་ཐེག་ནི་བྱིས་པར་མཚོན་ན་གནམ་ལྟ་བུ་ཡིན་སྲིད།ཨ་མའི་རྟིང་སྐུལ་གྱིས་བྱིས་པའི་སེམས་ཤུགས་དང་སྤྲོ་སྣང་འཇིག་རྟེན་གྱི་སྒོ་འཕར་ཡངས་པོར་ཕྱེ་ནུས་པར་གྲགས་སོ།།
རྩོམ་ཡིག་གི་ཁུངས།ཞིན་ལང་སློབ་གསོ།༼ཧཱ་ཧྲིན་དྲ་ཐོག-ཁྱིམ་ཚང་སློབ་གསོ།༽
རྩོམ་ཡིག་ལ་སྣོན་འཕྲི་ཅུང་ཙམ་བྱས་ཡོད་ལ་དོན་སྒྱུར་ལ་གཞོལ་ཡོད།ཁ་བྱང་བཅོས་ཡོད།
༢༠༡༦-༡༡-༢ཉིན་བསྒྱུ
ར།
Topic: ༄༅།།བྱིས་པའི་ནུས་རྩལ་ཇི་ལྟར་འབུར་འཇོམས་བྱེད་པ་ཡིན།
No comments found.
New comment
Name
Subject
Comment
Please copy this text: 51522302d615
Menu
གློག་ཀླད་ལས་འཆར། Computer Project
བྱིས་སྐྱོང་བསླབ་བྱ།
སྐད་ཡིག་བསླབ་བྱ། Quotes
བསླབ་བྱ་གྲགས་ཆེན། Famous Quotes
ང་ཚོའི་སྐོར། About us
བྱིས་སྐྱོང་སློབ་གསོའི་མན་ངག་གཅེས་བཏུས།
བྱིས་པའི་གླུ་གཞས། Children's songs
བྱིས་པའི་བརྙན་འཕྲིན། Videos
ཐ་སྙད་གསར་བ།new vocabulary
བོད་ཡིག་སྦྱོང་ས། Learning Tibetan
སྒྲ་ལྡན་བྱིས་སྒྲུང་། Stories on MP3
འདྲ་པར། Event Photos
ཚོང་ཁང་། Shopping
ལོ་རེའི་སྙན་ཐོ། Annual report
བྱ་འགུལ། Events
སྣ་ཚོགས། Variety
གཡག་རྒོད་དང་འབྲེལ་བའི་གསར་འགྱྱར། Wildyaks in the news
Search site
Search site
Contact
Administrator
416-453-9887
admin@wildyaks.com
Homepage
Site map
RSS
Print