རྩོམ་པ་པོ། ལེན་ཏ·ཋོམ་སན།(Linda Thompson)

བསྒྱུར་མཁན། ཆུ་ལས་འབར།

སློབ་འགོ་ཚུགས་པའི་ཉིན་དང་བོར།ལྕམ་མོ་ཐམ་སན་(Thompson)གྱིས་ལོ་རིམ་ལྔ་བའི་སློབ་གྲོགས་ཚོའི་སྔུན་ནས་རྫུན་ཞིག་བཤད།མོས་སློབ་མ་ཚོར་ལྟ་བཞིན།མོ་འཛིན་གྲྭའི་སློབ་མ་སོ་སོར་ལྟ་ཚུལ་འདྲ་མཉམ་ཡིན་ཞེས་བཤད།འོན་ཀྱང་དེ་ནི་དཔེ་མི་སྲིད་པ་ཞིག་རེད་དེ།རྒྱུ་རྐྱེན་ནི་འདུག་སྟེགས་མདུན་གྲལ་དུ་ཡོད་པའི་བུ་ཆུང་མིང་ལ་ཐའེ་དིས་སི་ཐའོ་དར་དི་(Teddy Stodard)རུ་འབོད་པ་དེའི་སྟབས་ཀྱིས་ཡིན།ཐའེ་དིས་དང་སློབ་གྲོགས་གཞན་དག་མཉམ་དུ་རྩེད་འདྲིས་འགྲོ་མི་བཏུབ་པ་དང་།གྱོན་པ་རྙིང་ཧྲལ་ཡིན་ལ་ལུས་ཕུང་གྲལ་དག་མིན་པ་མ་ཟད།སློབ་གྲོགས་ཚོས་ཁོར་དགའ་བོ་མི་བྱེད་པ་ལྕམ་ཐམ་སན་གྱིས་རྒྱུས་ལོན་པས།མོས་ནམ་ཞར་དུ་ཁོའི་སྦྱང་ཚན་སྟེང་ནོར་རྟགས་དམར་བོ་གསལ་ལ་ཆེ་བ་དེ་དག་རྒྱག་པར་སྤྲོ་བོ་བྱེད་པ་རེད།

དུས་ཡུན་ག་ཤེད་ཅིག་གི་མཚམས་སུ།དགེ་རྒན་ཚོར་སློབ་གྲྭས་སློབ་མ་སོ་སོའི་འདས་ཟིན་པའི་དཔྱད་འཇོག་ཡི་གེ་ལ་བསྐྱར་ཞིབ་བྱེད་དགོས་པའི་བླང་བྱ་ཞིག་བཏོན།མོས་ཐའེ་དིས་ཀྱི་ཡིག་ཚགས་ལ་ལྟ་འདུན་མི་དྲག་པས་ཆེས་མཇུག་ཏུ་བསྐྱུར་ནས་བལྟས།འོན་ཀྱང་ཐའེ་དིས་ཀྱི་ཡིག་ཚགས་ལ་ལྟ་སྐབས་མོ་ཧ་ལས་ཧང་སངས་པར་གྱུར།

ལོ་རིམ་དང་བོའི་དགེ་རྒན་གྱིས།ཐའེ་དིས་ནི་བློ་རིག་བཀྲ་བའི་བྱིས་པ་ཞིག་རེད།ནམ་ཡང་འཛུམ་གྱིས་བཀཡོད།སྦྱང་ཚན་བྲིས་པ་ཤིན་དུ་གྲལ་དག་པ་དང་།གུས་ཞབས་ལྡན།ཁོས་ཉེ་འཁོར་གྱི་མི་ལ་ནམ་ཡང་སྤྲོ་བ་སྟེར་ནུས་ཞེས་བྲིས་ཡོད་འདུག

ལོ་རིམ་གཉིས་པའི་དགེ་རྒན་གྱིས།ཐའེ་དིས་ནི་འཛིན་གྲྭའི་སློབ་མ་རྩེ་འཕུད་ཀྱི་གྲས་ཡིན།སློབ་གྲོགས་ཚོས་ཁོ་ལ་དགའ་བོ་བྱེད་མོད།འོན་ཀྱང་ཁོར་སེམས་ཁྲལ་ཞིག་ཡོད།དེ་ནི་ཁོའི་ཨ་མ་ནད་ཀྱིས་མནར་ནས་གྲོངས་ལ་ཉེ་བས་རེད་ལ།ཁྱིམ་ཚང་གི་འབྱོར་བ་ཉམ་ཐག་རེད་འདུག་ཅེས་བྲིས་འདུག

ལོ་རིམ་གསུམ་པའི་དགེ་རྒན་གྱིས།ཨ་མ་གྲོངས་པས་ཁོའི་སེམས་ལ་རྨ་ཁ་ཟབ་མོ་བཟོས་འདུག ཁོས་རང་གི་ནུས་པ་རྩལ་དུ་སྤྲུགས་ནས་འབད་བརྩོན་བྱེད་བཞིན་ཡོད་མོད།ཁོའི་ཨ་ཕ་ནི་འགན་འཁྲིའི་འདུ་ཤེས་མེད་པའི་ཨ་ཕ་ཞིག་རེད།གལ་ཏེ་ད་ལྟ་ནས་ཐབས་བཀོད་ཅིག་མ་འཐེན་ཚེ།ཁོར་ཁྱིམ་ཚང་གི་ཤན་ཤུགས་ངན་པ་ཐེབས་སྲིད་པ་གདོན་མི་ཟའོ་ཞེས་བྲིས་འདུག

ལོ་རིམ་བཞི་བའི་དགེ་རྒན་གྱིས།ཐའེ་དིས་ཀྱི་རང་གཤིས་ཁེར་ཧྲེང་ཅན་ཡིན་པས།ད་ལྟ་ཁོ་སློབ་སྦྱོང་ལ་སྤྲོ་བ་མེད་པ་དང་གྲོགས་པོའང་མེད།མཚམས་མཚམས་སུ་སློབ་ཐུན་སྐབས་གཉིད་འགྲོ་ཡི་འདུག་ཅེས་བྲིས་འདུག

སྐབས་དེར།ལྕམ་ཐམ་སན་གྱིས་གནད་དོན་གྱི་འབྱུང་རྩ་ཤེས་ཚོར་བྱུང་བས།རང་ཉིད་ཀྱི་སྤྱོད་པ་ལ་ངོ་གནོང་བར་གྱུར།ཁི་རེ་སི་མའད་སི་(Christmas)དུས་ཆེན་ཐོན་སོང་།སློབ་མ་ཚོས་དུས་ཆེན་ལེགས་སྐྱེས་གནང་སྐབས།མོ་དེ་བས་ཀྱང་འགྱོད་གདུང་དང་ངོ་ཚས་གཙེ།སློབ་མ་ཚང་མའི་ལེགས་སྐྱེས་ལ་འོད་འཚེར་བའི་མདོག་ལྡན་ཤོག་བུས་ཕྱི་ཐུམ་དྲིལ་ཡོད་པ་མ་ཟད།སྟེང་དུ་མཛེས་སྡུག་ལྡན་པའི་ཤོག་ཁྲས་ཡག་ལས་ཀྱང་བྱས་འདུག་མོད།ཐའེ་དིས་ཀྱི་ལེགས་སྐྱེས་གཅིག་པུ་དེ་འདྲ་ཞིག་མ་ཡིན་ནོ།

ཁོའི་ལེགས་སྐྱེས་ནི་བཙོ་ཤོག་མཐུག་པོས་བཏུམས་ཡོད་ལ།བཙོ་ཤོག་དེའང་གཞན་པའི་དངོས་ཟོག་གི་ཕྱི་ཐུམ་ལས་བླངས་པ་རེད་འདུག ལྕམ་ཐམ་སན་གྱིས་ལེགས་སྐྱེས་ཕྱི་ཐུམ་ལས་ཕྱིར་འདོན་པར་དཀའ་ལས་ཨེན་ཙམ་བརྒྱབ་མོད་མཐར་ཕྱིར་བཏོན།

དེ་ནི་རྡོ་ཆུ་ཤེལ་གྱི་སོར་གདུབ་ཅིག་ཡིན་ལ་སྟེང་གི་རྡོ་ཆུ་ཤེལ་གཅིག་བོར་འདུག ད་དུང་བཞི་ཆའི་གཅིག་མ་གཏོགས་མེད་པའི་ཞིམ་རྫས་དམ་བུ་གཅིག་བཅས་འདུག སློབ་གྲོགས་རེ་འགས་འཕྱ་དམོད་ཀྱི་ཁྲེལ་དགོད་བྱེད་པ་ལྕམ་ཐམ་སན་གྱིས་འཕྲལ་དུ་བཀག་འགོག་བྱས་ནས།ཆུ་ཤེལ་སོར་གདུབ་དེ་ཡག་རབས་ཀྱི་བསྟོད་པ་བྱེད་བཞིན་རང་གི་སོར་མོར་བསྐོན།ལག་ངར་ལ་ཞིམ་རྫས་དེ་བྱུགས་ནས་ཞིམ་རབས་བཤད་པ་རེད།

ཉིན་དེའི་སློབ་གྲྭ་གྲོལ་རྗེས།ཐའེ་དིས་ཀྱིས་སྐད་ཆ་ཚིག་གཅིག་བཤད་རྗེས་གཞི་ནས་ཡུལ་ལ་ལོག ལྕམ་མོ་ཐམ་སན་ལགས།དེ་རིང་ཉིད་ཀྱི་ལུས་སྟེང་གི་དྲི་མ་ངའི་ཨ་མ་དང་ཨ་ན་མ་ན་རེད་ཟེར།

བྱིས་པ་ཚོ་ཡུལ་ལ་ལོག་རྗེས།ལྕམ་ཐམ་སན་ལགས་གཞུང་ཤག་ཏུ་མ་མཐའ་ཡང་དུས་ཚོད་གཅིག་གི་ཡུན་ལ་ངུས་ནས་ལུས།ཉིན་དེ་ནས་བཟུང་།མོས་དཔེ་ཀློག་དང་སྦྱང་ཚན་འབྲི་བ།བརྩི་རྒྱག་ཕྱོགས་ཀྱི་ཞིབ་འཇུག་ལས་ཀ་ཕར་གཡུག་ནས།བྱིས་པ་ཚོར་དོན་དམ་གྱི་སློབ་གསོ་ཇི་ལྟར་སྤྲོད་ལུགས་ལ་ཞིབ་འཇུག་བྱེད་འགོ་བརྩམས།ལྕམ་ཐམ་སན་གྱིས་ཐའེ་དིས་ལ་དོ་སྣང་ཤུགས་དྲགས་བྱེད་འགོ་བརྩམས།མོས་ཁོ་དང་མཉམ་དུ་སློབ་སྦྱོང་བྱེད་སྐབས།ཁོ་རྣམ་རིག་དྲག་ཏུ་རྒྱས་ལ།སྐུལ་མ་ག་ཙམ་བྱས་པ་དེ་ཙམ་གྱིས་ཁོའི་ཚུར་སྣང་དེ་ཙམ་སྐྱེན་པོར་གྱུར།

ལོ་དེའི་ལོ་མཇུག་ཏུ།ཐའེ་དིས་འཛིན་གྲྭའི་སློབ་མ་བཟང་ཤོས་སུ་གྱུར།མོས་འཛིན་གྲྭའི་སློབ་མ་སོ་སོ་ལ་འདྲ་མཚུངས་ཀྱིས་དགའ་ཞེས་བཤད་མྱོང་མོད།སྐབས་འདིར་ཐའེ་དིས་ཁོ་མོའི་"གཅེས་ཕྲུག་"གཅིག་པུ་ལ་གྱུར་ཡོད་དོ།།ལོ་གཅིག་གི་རྗེས་ནས།ལྕམ་ཐམ་སན་གྱིས་སྒོ་བར་ནས་ཤོག་བྱང་ཞིག་མཐོང་།དེ་ནི་ཐའེ་དིས་ཀྱིས་བཞག་པ་ཡིན་དེ།ཁྱེད་ནི་ངའི་མི་ཚེ་ནང་འཕྲད་པའི་དགེ་རྒན་བཟང་ཤོས་དེ་ཡིན་ཞེས་བྲིས་འདུག་གོ།ཡང་ལོ་དྲུག་འགོར་སོང་།ལྕམ་ཧམ་སན་ལ་ཐའེ་དིས་ཀྱི་ཤོག་བྱང་གཞན་ཞིག་འབྱོར།ཁོས་རང་ཉིད་མཐོ་འབྲིང་ནས་མཐར་ཕྱིན་པ་དང་།སྦྱང་འབྲས་འཛིན་གྲྭའི་ཨང་གསུམ་པ་ཐོབ་ཡོད་རབས་དང་།ཁོ་མོ་ནི་ནམ་ཡང་ཁོའི་མི་ཚེའི་ནང་འཕྲད་པའི་དགེ་རྒན་བཟང་ཤོས་དེ་ཡིན་ཞེས་བྲིས་འདུག

ལོ་མང་བོའི་རྗེས་ནས།ལྕམ་ཐམ་སན་ལ་འཕྲིན་ཡིག་ཅིག་འབྱོར།ཐེངས་འདིར་ཐའེ་དིས་ཀྱིས་བཤད་རྒྱུར།རང་ལ་འབུམ་རམས་པའི་བསླབ་གནས་ཐོབ་མོད།ཁོ་ད་དུང་མུ་མཐུད་དུ་སློབ་གྲྭ་ནས་སློབ་སྦྱོང་བྱེད་པར་སེམས་ཐག་བཅད་ཡོད་རབས་དང་།ལྕམ་ཐམ་སན་ནི་ནམ་ཡང་ཁོའི་མི་ཚེ་ཁྲོད་ཀྱི་དགེ་རྒན་བཟང་ཤོས་ཡིན་ཞེས་བྲིས་འདུག དེའི་རྗེས་ཀྱི་འཕྲིན་ཡིག་ཐོག་གི་ཐའེ་དིས་ཀྱི་མིང་ཇེ་རིང་དུ་སོང་ཡོད་པ་སྟེ།གསོ་རིག་འབུམ་རམས་པ་ཐེའོ་ཌོར་Fཐའེ་དིས་སི་དའོ་དར་དི་ཞེས་བྲིས་འདུག ལོ་དེའི་དཔྱིད་ཀར།ཡང་ཐའེ་དིས་ཀྱི་འཕྲིན་ཡིག་ཅིག་འབྱོར་བྱུང་།ཁོ་གཉེན་སྒྲིག་བྱེད་པར་གྲ་སྒྲིག་བྱེད་བཞིན་ཡོད་པ་དང་།ལྕམ་ཐམ་སན་གཉེན་སྒྲིག་སྟོན་མོར་མགྲོན་དུ་བོས་ཡོད་པ་མ་ཟད།མོ་ཐའེ་དིས་ཀྱི་ཨ་མའི་འདུག་གནས་སུ་བཞུགས་ཆོག་མིན་དྲིས་འདུག་གོ།

ལྕམ་ཐམ་སན་མགྲོན་པོར་སོང་བ་མ་ཟད།རྡོ་ཆུ་ཤེལ་གཅིག་བོར་སོང་བའི་ཆུ་ཤེལ་སོར་གདུབ་དེ་སོར་མོ་ནབ་ཡོད་ལ།ཐའེ་དིས་ཨ་མའི་ཞིམ་རྫས་ཀྱང་ཆེད་དུ་བྱུགས་ཡོད་འདུག སྐབས་དེར།དགེ་སློབ་གཉིས་ཕན་ཚུན་འཐམ་འཁྱུད་བྱེད་སྐབས།འབུམ་རམས་པ་སི་དའོ་དར་དིས་ལྕམ་ཐམ་སན་གྱི་རྣ་ལམ་དུ་ངག་འཇམ་པོས།ལྕམ་ཐམ་སན་ལགས།ཁྱེད་ཐུགས་རྗེ་ཆེ།ཉིད་ཀྱིས་ང་མི་ངོ་མ་ཞིག་ཏུ་བཏང་བར་ཤིན་དུ་ཐུགས་རྗེ་ཆེ་ཞེས་བཤད།ལྕམ་ཐམ་སན་གྱི་མིག་མཐའ་མཆི་མས་བརླན་ཡོད་ལ་ངག་འཇམ་པོས།ཐའེ་དིས།ཁྱོད་ནོར་སོང་།ཁྱོད་ཀྱིས་ང་ལ་སློབ་གསོ་སྤྲད་སོང་།ཁྱོད་དང་འཕྲད་པས།ངས་དགེ་རྒན་ཞིག་ཇི་ལྟར་བྱེད་ཚུལ་ཤེས་སོང་ཞེས་བཤད།

ནུབ་ཕྱོགས་པས་གཏམ་རྒྱུད་འདི་དགེ་རྒན་དང་སློབ་གསོ་ལག་ལེན་པ་ཡོངས་ལ་བརྒྱུད་སྒྲོག་བྱེད་ཀྱི་ཡོད་པར་གྲགས།

གཏམ་རྒྱུད་འདི་ལས་ང་ཚོས་དོན་དམ་གྱི་སློབ་གསོ་ངོ་མ་ནི་ག་འདྲ་ཞིག་ཡིན་པ་མཐོང་ཡོང་གི་མི་འདུག་གམ།འདིས་ནི་ཏན་ཏན་ང་ཚོ་ལ་དགེ་རྒན་བཟང་བོ་ཞིག་གི་འོས་འགན་བསྟན་བྱུང་དེ།མོས་དགེ་རྒན་ཞེས་པའི་མིང་འདི་ལ་བདག་པོ་འདི་ལྟར་བརྒྱབ་པ་དང་།དེ་བས་ཀྱང་རིན་ཐང་བྲལ་བ་ཞིག་ནི།མོའི་སེམས་རྒྱུད་ན་བྱམས་བརྩེའི་གཏམས་ཡོད་ལ།དེས་སྐུལ་ངོར་རླབས་ཆེ་བའི་དོན་དག་འདི་ལག་ལེན་གྱི་ངོས་ནས་འགྲུབ་པར་གྱུར་བ་རེད།

བྱིས་པ་ཞིག་ལ་མཚོན་ན།དགེ་རྒན་ནི་ག་འདྲའི་གལ་ཆེན་པོ་དང་།ཁོ་ཚོར་མཁོ་བ་ནི་དགེ་རྒན་གྱི་བྱམས་བརྩེ་རྣལ་མ་དེའོ།།

རྒྱུ་མཚན་ལྡན་པར་འདོད་ན།ཉིད་ཀྱིས་གཏམ་རྒྱུད་འདི་བརྒྱུད་སྐུར་གནང་རོགས།བཀའ་དྲིན་ཆེ།

གསལ་བཤད། རྩོམ་གྱི་ཁ་བྱང་བཅོས་ཡོད།

《ཨིན་ཡིག་བདམས་རྩོམ།》2002ལོའི་དེབ་དང་བོ་ལས་བཏུས།

རྩོམ་པ་པོ།ལེན་ཏ·ཋོམ་སན།༼Linda Thompson༽

རྩོམ་བྱང་།《ལྕམ་ཧམ་སན།》

སྤྱི་ལོ་༢༠༡༦-༡༠-༢༤ཉིན།