པདྨ་འཚོའི་འགྲན་རྩོད་ལས་འཕྲོས་པའི་མྱོང་ཚོར།

པདྨ་འཚོའི་འགྲན་རྩོད་ལས་འཕྲོས་པའི་མྱོང་ཚོར།

ལས་ཀ་དང་དུས་ཚོད་གཉིས་ཀྱིས་རང་དབང་མ་སྤྲད་པས་རྒན་གཡག་རྒོད་དང་ཁོང་གི་བུ་བརྟན་འཛིན་གཉིས་ཀྱིས་བརྩམས་པའི་པདྨ་མཚོའི་འགྲན་རྩོད་ཅེས་པའི་བྱིས་སྒྲུང་དེ་དེ་རིང་མ་གཏོགས་ཞིབ་མོ་ཞིག་བཀླགས་མ་ཐུབ། བྱིས་སྒྲུང་དེ་བཀླགས་རྗེས་རང་གི་སྣང་ངོར་མྱོང་ཚོར་ཞིག་མི་ཐབས་མེད་དུ་གྱུར་སོང་། མི་ལ་ལས་བྱིས་སྒྲུང་འདི་ཡག་པོ་འདུག   འདིས་བྱིས་པ་ཚོར་དཔེ་ཆ་བཀླག་རྒྱུའི་མོས་པ་བསྐྲུན་ཐུབ་ཅིང་ལྷག་པར་དུ་བུད་མེད་ཚོར་སེམས་ཤུགས་སྤྲོད་ཐུབ་ས་རེད་འདོད་ནའང་ངས་བཀླགས་པའི་མྱོང་ཚོར་ལྟར་ན། དཔེ་ཆ་འདི་བྱིས་སྒྲུང་ཙམ་མ་ཡིན་པར་ང་ཚོ་མི་ཆེན་ཚོའི་བསམ་བློ་རྗེས་ལུས་ཡིན་པ་དང་དོན་མེད་སར་བྱིས་པ་མང་བོ་ཞིག་གི་མི་ཚེའི་མདུན་ལམ་ལ་བར་ཆད་བཟོ་བཞིན་འདུག་པའི་གནད་དོན་འགའ་བྲིས་ན་འདི་ལྟར་སྙམ ། ༡ པདྨ་མཚོས་ཕ་མ་གཉིས་ལ་རྟ་རྒྱུག་འགྲན་སྡུར་ལ་ཞུགས་ཆོག་པའི་རེ་བ་ཞུས་དུས། ཕ་མ་གཉིས་ཀྱིས་ཁྱིམ་མཚེས་དག་དང་གཉེན་ཉེ་སོགས་ལ་གྲོས་བསྡུར་བྱ་དགོས་ཞེས་པ་དེ་དང་འདྲ་བའི་གནད་དོན་མང་བོ་ཞིག་ང་ཚོའི་འཚོ་བའི་ནང་བྱུང་དང་འབྱུང་བཞིན་པ་རེད།  རང་གི་བུ་ཕྲུག་རང་གིས་སྐྱོང་དགོས་ལ་བུ་ཕྲུག་གི་འཇོན་ཐང་ཕ་མ་གཉིས་ཀྱིས་ཤེས་དགོས་པ་ཞིག་ཡིན་པ་ལས།  བུ་ཕྲུག་གི་ལས་དབང་ཁྱིམ་མཚེས་དང་གཉེན་ཉེ་ཚོའི་ལག་ཏུ་བཞག་ན་ཕ་མས་རང་གི་བུ་རྒྱུད་ལ་འགན་མ་ཁུར་བ་ཞིག་ཡིན་པར་འདོད། དེ་ལས་ཀྱང་ཐབས་སྐྱོ་བ་ཞིག་ནི་བུ་དང་བུ་མོའི་བཟའ་ཟླ་ཡང་ཕ་མ་དང་གཉེན་ཉེ་སོགས་ཀྱིས་ཐག་གཅོད་བྱེད་པ་དེ་རེད། སྤྱིར་བྱ་བ་ཆེ་ཆུང་ཅི་ཞིག་ཡིན་ཡང་དང་པོ་གཞན་གྱི་བསམ་ཚུལ་བསྡུས་ཏེ་མཐར་ཐག་གཅོད་བྱེད་མཁན་བུ་ཕྲུག་རང་ཉིད་ཡིན་ན་བཟང་སྙམ ། ༢ ཁྱིམ་མཚེས་དང་གཉེན་ཉེ་ཚོས་གྲོས་བསྡུར་བྱས་རྗེས། པདྨ་མཚོ་ལ་རྒྱབ་སྐྱོར་རྒྱུ་ཕར་ཞོག   བུ་མོ་ཞིག་ལ་བུ་མོའི་ལས་ཀ་ཞིག་ཡོད་ཟེར་ཏེ་ཁོ་མོའི་འདོད་ཐོག་ཏུ་མ་བཞག་པའི་གནད་དོན་འདི་ལྟ་བུ་ང་ཚོའི་སྤྱི་ཚོགས་ནང་ཧ་ཅང་མང་བོ་ཞིག་ཡོད། བུ་མོ་ཚོས་མི་ཤེས་ལ་བུ་མོ་ཚོས་སྒྲུབ་ཐུབ་ནི་མ་རེད་རྐྱང་རྐྱང་ཟེར་བཞིན་བསྡད་ན། རང་ཉིད་ཀྱི་ཨ་མའི་བཀའ་དྲིན་ཡང་རྡོག་བརྫིས་བཏང་བ་མ་ཡིན་ནམ། རྒྱུ་མཚན་ནི་ང་ཚོར་འཇིག་རྟེན་འདིར་བདེ་སྐྱིད་ལོངས་སུ་སྤྱོད་པའི་གོ་སྐབས་བཟང་བོ་འདི་འདྲ་སྩོལ་མཁན་ནི་ཨ་མ་ཡིན་པས་སོ། སྤྱིར་རྒྱབ་སྐྱོར་མེད་པའི་མི་སུ་ཡིན་ཡང་ཡར་རྒྱས་སུ་འགྲོ་རྒྱུ་ཧ་ཅང་དཀའ་མོ་རེད། དཔེར་ན། ཕྱི་ལོ༢༠༡༥ལོའི་ཟླ༡༡པའི་ཚེས༢༣ཉིན་འཇར་མན་གྱི་ཚགས་ཤོག་སྐད་གྲགས་ཅནSPIEGEL(མེ་ལོང) ཞེས་པ་དེས་ཕྱི་ལོ༢༠༡༢ལོར་ཞིབ་འཇུག་བྱས་པ་ལྟར་ན། བུ་མོ་ཚོའི་གྲངས་རིག་སྦྱངས་འབྲས་བུ་དག་ལས་ཞན་པའི་རྒྱུ་མཚན་གཙོ་བོའང་བུ་མོ་ཚོར་རྒྱབ་སྐྱོར་བྱེད་མཁན་ཉུང་བས་རྐྱེན་ཡིན་པ་ལས་བུ་མོ་ཚོའི་རིག་སྟོབས་བུ་ལས་ཞན་པ་མ་ཡིན་ཅེས་བའི་རྒྱུ་མཚན་ཞིག་བཀོད་འདུག ཁོང་ཚོས་བུ་མོ་ཚོར་རྒྱབ་སྐྱོར་བྱས་པའི་རྒྱུགས་འབྲས་དང་རྒྱབ་སྐྱོར་མ་བྱས་པའི་རྒྱུགས་འབྲས་ལ་ཞིབ་འཇུག་བྱས་པ་རེད། འདི་ནས་ཤེས་དགོས་པའི་རྒྱབ་སྐྱོར་བྱེད་སྟེངས་ཞིག་ནི། དཔེར་ན། ཕ་མ་དང་གཉེན་ཉེ་སུ་ཡིན་རུང། བུ་མོ་ཚོ་ལ། ཁྱེད་ཀྱི་ལུས་སྟོབས་ལྟོས་བཅས་ཀྱིས་བུ་ཚ་དང་བསྡུར་ན་ཅུང་ཞན་མོད། འོན་ཀྱང་སློབ་སྦྱོང་བྱེད་པ་དེ་ཤེས་རབ་ལ་བརྟེན་པ་ལས་གཟུགས་པོའི་སྟོབས་ཤུགས་ལ་བརྟེན་མི་དགོས་པས། བུ་དག་གིས་སྦྱོང་ཐུབ་པ་ཞིག་ཡིན་ན་ཁྱེེད་ཚོས་ཀྱང་སྦྱོང་མི་ཐུབ་པ་ཞིག་ཡོད་མི་སྲིད། ནམ་ཡང་ང་ཚོ་ཚང་མ་མི་ཡིན་པ་གཅིག་མཚུངས་རེད་ཟེར་དགོས་པ་དེ་ཧ་ཅང་གལ་ཆེན་རེད། ང་ཚོས་གནའ་སྔ་མོ་མི་རིགས་ནག་པོ་དག་གིས་རང་གི་བུ་མོ་ཨ་རི་ལ་བྲན་གཡོག་ཏུ་བཙོང་བ་ལྟར་བྱས་ན། རང་གི་ཁྱིམ་ཚང་དང་མི་རིགས་ལའང་གནོད་སྐྱོན་ཆེན་པོ་བཟོས་པ་མ་ཡིན་ནམ། ༣ དེ་ལས་ཀྱང་དགོད་བྲོ་བ་ཞིག་ནི་རྟ་རྒྱུག་ལ་ཕམ་ཁ་ཉོས་རྗེས། རང་ཉིད་ཀྱི་མིང་དང་རྒྱུ་ནོར་སོགས་ཀྱི་ཆེད་དུ་ཡུལ་མིའི་གོམས་སྲོལ་ཏེ ། བུ་མོ་གཞན་དག་ལ་མིག་དཔེ་ངན་པ་འཇོག་སྲིད་ཟེར་བ་སོགས་ཚང་མ་དོར་ཏེ། པདྨ་མཚོ་རྟ་རྒྱུག་འགྲན་བསྡུར་ལ་ཞུགས་སུ་བཅུག་པ་དེ་རེད། ནམ་རྒྱུན་རྣམ་རྟོག་ཅི་འདྲ་ཟ་མཁན་ཞིག་ཡིན་ནའང་དཀའ་ངལ་ཅུང་ཙམ་ཞིག་ལ་ཐུག་དུས། ཡོད་ཚད་དོར་མཁན་ཡང་ཁོ་ཚོ་རེད། དེ་ཡང་རྣམ་རྟོག་ཟ་མཁན་དེ་ཚོར་རྒྱུ་མཚན་ཡང་དག་པ་ཞིག་མེད་པའི་རྐྱེན་ཡིན་པར་འདོད། ཧ་ཧ་ཧ་ ་ ་ ༤ མཐར་པདྨ་མཚོས་ཨང་དང་པོ་བླངས་རྗེས། ཕམ་ཁ་ཁུར་བའི་རྟ་བདག་དག་གིས་ཕྲག་དོག་བྱས་པ་དེ་ནི་དངོས་གནས་བྱེད་ཐབས་སྐྱོ་བོ་རེད་སྙམ། རྒྱུ་མཚན །  འདས་པའི་ངོ་ལོ་སྟོང་ཕྲག་གོང་ནས་ད་ལྟའི་བར་དུ་ང་ཚོའི་བོད་པ་དག་གིས་ཕན་ཚུན་ལ་ཕྲག་དོག་དང་གཡོ་སྒྱུ་སྣ་ཚོགས་འཁྲབ་པས་ང་ཚོ་ད་ལྟའི་ཡ་ང་བའི་གནས་སྟངས་འདི་འདྲ་ལ་འཕྲད་པ་མ་ཡིན་ནམ།  དེ་བས་ང་ཚོས་ཕམ་ཁ་གང་ཞིག་ཁུར་བའི་རྗེས་སུ ། རང་ཉིད་ཡར་རྒྱས་གཏོང་བའི་ཐབས་ལམ་འཚོལ་དགོས་པ་ལས། རྩོད་པ་བསླངས་ཏེ་བུའི་བཟང་ངན་བསྡུར་ན ། མཐར་རང་གཞན་གཉིས་ཀྱིས་ཕམ་ཁ་འཁུར་བ་ལས་གཞན་འབྲས་བུ་གང་ཡང་མེད་པར་མ་ཟད ། བྱེད་ཐབས་འདིས་ང་ཚོའི་ཡུལ་སྲོལ་གོམས་གཤིས་ཡག་པོ་དེའང་བསྒྱུར་བ་མ་ཡིན་ནམ ། ད་དུང་བཤད་རྒྱུ་ཧ་ཅང་མང་བོ་ཡོད་ཀྱང་ཚང་མས་ཤེས་རྒྱུ་རེད་བསམ་ནས་གསལ་འདེབས་ཙམ་གྱི་ཚུལ་དུ་ད་དེ་ཙམ་བྱ།  ༥ འདི་ནི་རང་ཉིད་ཀྱི་བསམ་ཚུལ་ཙམ་ཡིན། རྒྱུ་མཚན་མེད་པའི་རྩོད་གླེང་གི་རྗེས་སུ་བླ་མ་ཞིག་གདན་འདྲེན་ཞུས་པ་དེ་རེད། བྱིས་སྒྲུང་འདིའི་ནང་བླ་མ་ལ་གུས་པ་ཡོད་ཚུལ་བསྟན་ཡོད་ཀྱང་ང་ཚོའི་འཚོ་བའི་ཁྲོད་དུ་བླ་མ་ལ་ནང་ཆོས་ཞུ་རྒྱུ་ལས། བཟའ་ཟླ་གཉིས་མ་མཐུན་པའི་སྐབས་བླ་མ་གདན་འདྲེན་ཞུ་རྒྱུ་དང་ཟ་ཁང་ཞིག་གི་སྒོ་འབྱེད་སྐབས་ཀྱང་བླ་མ་གདན་འདྲེན་ཞུ་བ ། རྟ་རྒྱུག་འགྲན་སྡུར་ཡིན་ནའང་དེ་དང་དེ་བཞིན་རེད། དེ་ལྟར་བྱས་ཚེ་གཞོན་སྐྱེས་རྣམས་ཀྱི་སྣང་ངོར་བླ་མ་ཞེས་པའི་མཚན་ཙམ་གླེང་དུས་དེ་ནི་གྲོང་པའི་ཁྲིམས་དཔོན་ཙམ་ཡིན་པ་ལས་ནང་ཆོས་ཞུ་ས་ཡིན་པ་ཚོར་མི་ཐུབ་པ་ལྟ་བུར་འགྱུར་ངེས་ཤིང་།དེ་ལས་ཀྱང་ཚབས་ཆེ་བ་ནི་མཚམས་རེར་བླ་མས་ཐག་བཅད་པ་དེས་ཕན་འབྲས་མ་ཐོན་པ་དང་ལྟ་ཕྱོགས་འདྲ་མིན་བྱུང་དུས ། མཐར་དད་ལོག་སྐྱེ་མཁན་ཡང་ཧ་ཅང་མང་བའི་དངོས་ཡོད་དཔེ་མཚོན་ལྟ་བུའོ ། རྒྱལ་རོང་བརྩོན་འགྲུས་ཀྱིས། ཕྱི་ལོ་༢༠༢༡ལོའི་ཟླ༡༢ཚེས༢༤ཉིན་ཞོགས་པ་དུས་ཚོད་གཉིས་དང་སྐར་མ་དགུའི་སྟེང་དུ་འཇར་མན་ནས་བྲིས།

Topic: པདྨ་འཚོའི་འགྲན་རྩོད་ལས་འཕྲོས་པའི་མྱོང་ཚོར།

No comments found.

New comment