བུ་ཆུང་དང་མཉམ་དུ༼པདྨ་མཚོའི་འགྲན་རྩོད༽ཅེས་པའི་བྱིས་སྒྲུང་བཀླགས་པ།

བུ་ཆུང་དང་མཉམ་དུ༼པདྨ་མཚོའི་འགྲན་རྩོད༽ཅེས་པའི་བྱིས་སྒྲུང་བཀླགས་པ།

བུ་ཆུང་དང་མཉམ་དུ༼པདྨ་མཚོའི་འགྲན་རྩོད༽ཅེས་པའི་བྱིས་སྒྲུང་བཀླགས་པ།
  

དབལ་བཟའ་ནོར་འཛིན་དབང་མོ།

 

གུས་པར་འོས་པའི་དབལ་ཤུལ་མཁས་གྲུབ་ལགས།  ཁྱེད་ཀྱིས་བརྩམས་པའི་བྱིས་སྒྲུང༼པདྨ་མཚོའི་འགྲན་རྩོད༽ཅེས་པའི་དེབ་ཆུང་དེ་ངེད་ཅག་གི་ལག་ཏུ་འབྱོར་བྱུང་བས།  ཐལ་མོ་སྙིང་ཁར་སྦྱར་ཏེ་ཁྱེད་ལ་བཀའ་དྲིན་ཆེ་ཞུ།  ཁྱེད་ཀྱིས་ལོ་ལ་ལོ་དང་ཟླ་ལ་ཟླ་མཐུད་ནས། དཀའ་མོའི་ཚེགས་དང་དཀོན་མོའི་རྒྱུ་ལ་མ་འཛེམས་པར།  ལྷག་བསམ་འོ་མཚོ་ལས་འཁྲུངས་པའི་རྔུལ་ཆུའི་ཐིགས་པ་རེ་རེ་མ་འོངས་དང་ད་ལྟར་གཉོམ་ལག་རྒྱས་བཞིན་པའི་གངས་ལྷའི་ཁྱུ་ཚོགས་ཀྱི་ལུས་ངག་ཡིད་གསུམ་ལ་མཆོད་པར་འབུལ་བཞིན་ཡོད་པ་དེ་ཀུན་གྱི་མིག་ལམ་དུ་འོད་ལམ་ལམ་འཚེར་བཞིན་གདའ།

ད་ཐེངས་ཡང་ཁྱེད་ཀྱི་ལྷག་བསམ་འོ་མའི་རྒྱ་མཚོ་ལས་འཁྲུངས་པའི༼པདྨ་མཚོའི་འགྲན་རྩོད༽ཅེས་པའི་བྱིས་སྒྲུང་དེ་སྤྱི་ཚོགས་སུ་བཀྲམ་པར། ཐོག་མར་དེ་ལ་བཀྲ་ཤིས་བདེ་ལེགས་ཀྱི་རྟེན་འབྲེལ་ཞུ།  

སྒང་པ་བོད་པའི་གཏམ་དཔེ་ལ།  ཟས་ཅི་ཟོས་ཟེར་ན་འདི་ཟོས་དང་།  ས་གར་སོང་ཟེར་ན་འདིར་སོང་ཟེར་བའི་དཔེ་དེ་དཔེ་ཀློག་ལ་སྦྱར་ནས་བཤད་ན།   དཔེ་ཆ་གང་ཞིག་ཀློག་པ་པོའི་སྤྱན་ལམ་དུ་བཀྲམ་པ་ན།   གང་གིས་སེམས་ཚོར་ཞིག་འབྲི་དགོས་པ་སྨོས་མེད་ཡིན་ལ།   དེའང་སེམས་ཀྱི་རྒྱགས་ཕྱེ་ལྟ་བུ་ཞིག་ཏུ་བརྩིས་ཆོག   ཡིན་ནའང་། བདག་ནི་ལེ་ལོ་དང་སྒྱུད་ལུག་གི་དབང་དུ་སོང་ནས།   དུས་ཚོད་ཡུན་རིང་ཞིག་ལ་བྱིས་སྒྲུང་འདི་བཀླགས་པའི་སེམས་ཚོར་ཞིག་ཀྱང་ཡི་གེར་བཀོད་མ་ཐུབ།   དེ་རིང་བཀླགས་ཚོར་གང་ཞིག་འབྲི་བར་འདོད་ནས་གློག་ཀླད་ཀྱི་རྩར་བསྡད་དེ་བྱིས་སྒྲུང་འདི་ཐེངས་དུ་མར་བཀླགས་མོད།   ཡིན་ནའང་།   བརྗོད་བྱ་དང་རྗོད་བྱེད། རི་མོ་སོགས་གང་གི་ཐད་ནས་ཀྱང་བདག་གིས་སེམས་ཚོར་དམིགས་བསལ་བ་ཅི་ཡང་འབྲི་རྒྱུ་མ་རྙེད།  དེ་བས་བསམ་བློ་ཡང་ཡང་བཏང་མཐར། བྱིས་སྒྲུང་ཞིག་ཡིན་པ་ལ་ཐོག་མར་བྱིས་པའི་བློ་ཁ་དང་འཚམ་ཞིང་འཚར་ལོངས་ལ་ཕན་དགོས་པ་ཞིག་ཡིན་པས།   བུ་ཆུང་དང་མཉམ་དུ༼པདྨ་མཚོའི་འགྲན་རྩོད༽ཅེས་པའི་བྱིས་སྒྲུང་དེ་བཀླགས་པ་ལས་བྱུང་བའི་ཁ་བརྡ་ཐུང་ཐུང་ཞིག་ཡི་གེར་བཀོད་ན།     ངའི་སེམས་ཚོར་ཉག་ཉོག་ལས་བྱིས་བློ་གཙང་མ་འདི་ལ་རིན་ཐང་ལྡན་ཤས་ཆེ་སྙམ་པས།   ངེད་མ་བུ་གཉིས་ཀྱིས་བྱིས་སྒྲུང་འདི་བཀླགས་པའི་ཁ་བརྡ་ལ་ཕྱིར་དྲན་ཞིག་བྱས་ཏེ་ཡི་གེར་བཀོད་པ་གཤམ་གསལ་ལྟར།  

 

ཨ་མ།   ཨ་མའི་གཅེས་ཕྲུག་འདིར་ཤོག་དང་།   དེ་རིང་འུ་གཉིས་ལ་བྱིས་སྒྲུང་གསར་བ་ཞིག་ཡོད་པས།  དེ་མཉམ་དུ་ཅིག་ཀློག་ཨེ་རེད།

བུ་ཆུང་།  ༼པདྨ་མཚོའི་འགྲན་རྩོད༽ ཨ་མ།   དཔེ་ཆ་འདི་གང་ནས་ཉོས་པ་ཡིན།   ལྷ་རྒྱལ་གླིང་དཔེ་ཁང་ན་ཡོད་དམ།  

ཨ་མ།   གཅེས་ཕྲུག    ལྷ་རྒྱལ་གླིང་ན་ཉོ་རྒྱུ་མི་འདུག    དཔེ་ཆ་འདི་ཨ་ཁུ་མཁས་གྲུབ་ཀྱིས་ཁྱོད་ལ་སྦྱིན་པ་རེད།   ཨ་ཁུ་གསོན་པོར་བསྐུར་འདུག   

བུ་ཆུང་།  ཨོ་ཧོ་ཧོ།   ཨ་ཁུ་གསོན་པོ།   ཅི་འདྲའི་མིང་མཚར་པོ་ཞིག་རེད་ད།   རི་མོ་འདི་ཨ་ཁུ་མཁས་གྲུབ་ཀྱིས་བྲིས་པ་ཨེ་རེད།  

ཨ་མ།  རེད།  ཚང་མ་ཨ་ཁུ་མཁས་གྲུབ་ཀྱིས་བྲིས་པ་རེད།  བྱིས་སྒྲུང་འདི་ནི་ཨ་ཁུ་མཁས་གྲུབ་ཁོ་རང་གི་ཕ་ཡུལ་རྔ་བའི་ཡུལ་གྱི་བུ་མོ་པདྨ་མཚོའི་བྱིས་དུས་ཀྱི་ལོ་རྒྱུས་ཤིག་རེད།

བུ་ཆུང་།  ཨ་མ།  རྔ་བ་ཟེར་ན་ཨ་ཁུ་ཉི་མ་ཚང་ཡོད་ས་དེ་ཨེ་རེད།  

ཨ་མ།  རེད་ཡ།     རྔ་བ་ན་ཨ་ཁུ་ཉི་མ་ཚང་ལས་གཞན་ད་དུང་སུ་ཚང་ཡོད་པ་རེད།

བུ་ཆུང་། ཅུང་སྡོད་དང་ཨ་མ།  ངས་ཨ་ཁུ་ཉི་མ་ཚང་གི་བོད་ཁྱིམ་མགྲོན་ཁང་དེ་ཅིག་བཙལ་དང་།

ཨ་མ།  གཅེས་ཕྲུག   ཨ་ཁུ་ཉི་མ་ཚང་གི་བོད་ཁྱིམ་མགྲོན་ཁང་དེབ་འདིའི་ཐོག་ན་ཡོད་ནི་མ་རེད།   པདྨ་མཚོ་ནི་རྔ་བའི་འབྲོག་སྡེ་ཞིག་ལས་ལག་ཆགས་པ་རེད།  རྔ་བ་ན། ཨ་ཁུ་ཉི་མ་ཚང་ལས་གཞན་འུ་གཉིས་ལ་ངོ་ཤེས་ཨེ་ཡོད་ད།

བུ་ཆུང་།  ཡོད་ནི་རེད།  ཨ་ནེ་འཛམ་ལྷ་ཚང་།   ཨ་ཁུ་རྟ་མེ་ཚང་།   དེ་མིན་ད་མི་དྲན་གི།  

ཨ་མ།  ཧེ་ཧེ།  རེད་ཡ།   ཨ་ནེ་འཛམ་ལྷ་ཚང་ལ་ཨ་ཁུ་ཟླ་བ་ཚང་ཟེར་དགོས་པ་རེད།  དེ་མིན་ཨ་བུ་ན་རོ་བཙན་དང་ཨ་བུ་ཐུ་བྷོད་བཙན་གཉིས་ཀའང་ཡོད་པ་རེད།   ད་དུང་ཨ་ཁུ་ཕུན་ཚོགས་ཚང་ཨེ་དྲན་གི།

བུ་ཆུང་།  འོ་རེད་ཡ།   དྲན་གི  སྒོ་མང་གྲོང་རྡལ་དུ་ཡོད་པ་དེ་ཚང་ཨེ་རེད།

ཨ་མ།  རེད།  གཅེས་ཕྲུག  

བུ་ཆུང་།  ད་འུ་གཉིས་ཀྱིས་དཔེ་ཆ་འདི་ཀློག་ཨེ་རེད།  

ཨ་མ།  ཡ་ཡ།  

བུ་ཆུང་།  ཨ་མ།   པདྨ་མཚོ་འབྲོག་པ་ཞིག་ཡིན་ནི་ཨེ་རེད།  རྔ་བ་རྫོང་ཐོག་ན་མེད་ཀི་ཨེ་ན།

ཨ་མ།   རེད།  མ་ལོ།   རྔ་བ་རྫོང་ལ་རོང་འབྲོག་གཉིས་ཀ་ཡོད་པ་རེད།   འུ་ཅག་རྒྱུན་དུ་རྔ་བ་རྫོང་ཐོག་ཏུ་འགྲོ་བ་ལས་པདྨ་མཚོའི་ཕ་ཡུལ་འབྲོག་སར་འགྲོ་མྱོང་ཡོད་མ་རེད།  

བུ་ཆུང་། ཨ་མ།  པདྨ་མཚོ་ང་ལས་ཆེ་བ་ཞིག་ཨེ་རེད་ད།  ངས་ཅིག་ལྟ་དང་།

ཨ་མ།  རེད།  ཨ་ཁུ་མཁས་གྲུབ་ཀྱིས་གནའ་སྔ་མོ་ཞིག་ལ་ཁོ་ཚོའི་སྡེ་བའི་ནང་དུ་པདྨ་མཚོ་ཟེར་བའི་ཞི་མོ་སྐྱ་རྩལ་ཅན་ཞིག་ཡོད་པ་དེ་ཆུང་ཆུང་ཡིན་དུས་ཀྱི་ལོ་རྒྱུས་ཡི་གེ་དང་རི་མོར་ཕབ་པ་རེད།  

བུ་ཆུང་།  དེས་ན་མོ་ངའི་ཨ་ཅེ་ཨེ་རེད།

ཨ་མ།  ཧེ་ཧེ།   རེད།  ཨ་ཅེ་པདྨ་མཚོ་ནི་རྟ་རྒྱུག་བྱེད་རྒྱུར་ཧ་ཅང་དགའ་བའི་བུ་མོ་ཆུང་ཆུང་ཞིག་རེད།  ལོ་རེར་ཁོ་ཚོ་སྡེ་བས་རྟ་རྒྱུག་འགྲན་སྡུར་བྱེད་སྐབས་མོ་རང་རྟ་རྒྱུག་ལ་ཞུགས་འདོད་ཀྱང་། སྐབས་དེར་བོད་པའི་སྤྱི་ཚོགས་སུ་ཞི་མོ་ཚོ་རྟ་རྒྱུག་ལ་ཞུགས་པའི་སྲོལ་མེད་པས་མོའི་གཉེན་ཉེ་དང་ཡུལ་སྡེ་ཚོས་མོ་ལ་རྟ་རྒྱུག་འགྲན་སྡུར་བྱེད་དུ་འཇུག་མི་སྲིད།  

བུ་ཆུང་།   ཅིའི་ཕྱིར་ཞི་མོ་ཚོ་རྟ་རྒྱུག་འགྲན་སྡུར་དུ་ཞུགས་སུ་མི་འཇུག་པ་རེད།

ཨ་མ།  ཁོ་ཚོའི་སེམས་སུ་ཞི་མོ་ཚོས་ཁྱིམ་ལས་བྱེད་པ་དང་འབྲི་མོ་བཞོ་བ་ལས་ཞི་ལུ་ཚོ་ནང་བཞིན་རྒྱུན་དུ་རྟ་རྒྱུག་བྱེད་པ་དང་མདའ་རྩེད་བྱས་པ་ཡིན་ན།   ཁྱིམ་ལས་ལས་མཁན་སོགས་མེད་པར་འགྱུར་བར་དོགས་པ་ཡིན་རྒྱུ་རེད་ལ།  

བུ་ཆུང་། དེ་ན།   པདྨ་མཚོ་རྟ་རྒྱུག་བྱེད་དུ་འགྲོ་སྐབས།   མོའི་ཕུ་བོ་ཚོས་ཁྱིམ་ལས་ལས་ན་མི་ཆོག་གམ།    

ཨ་མ། ཆོག་ད་ཆོག་ནི་རེད་དེ།   ཡིན་ནའང་ཁོ་ཚོས་རྒྱུན་དུ་ཁྱིམ་ལས་ལས་མ་མྱོང་བས་ཤེས་ནི་མ་རེད།  

བུ་ཆུང་། འོ་འོ།   ཕུ་བོ་ཚོས་ཁྱིམ་ལས་ལས་རྒྱུ་དང་འབྲི་བཞོ་རྒྱུ་སྦྱོང་ན་མི་ཆོག་ནི་ཨེ་རེད།  

ཨ་མ། ཆོག་ད་ཆོག་ནི་རེད་དེ།   ཞི་ལུ་ཚོས་འབྲི་བཞོ་རྒྱུ་སོགས་ཁྱིམ་ལས་བྱེད་སྲོལ་ཡོད་པ་མ་རེད།

བུ་ཆུང་། ཨ་མ་ངས་ཤེས་ཐ།   འབྲི་བཞོ་རྒྱུ་དང་ཁྱིམ་ལས་ལས་རྒྱུ་དེ་པདྨ་མཚོའི་ཆེད་ལས་ཡིན་རྒྱུ་རེད།

ཨ་མ།  ཧ་ཧ་ཧ།   ཆེད་ལས།  མ་རེད།  ཆེད་ལས་ད་མ་རེད།  ཡིན་ནའང་།  བུ་མོ་ཚོ་རྟ་རྒྱུག་འགྲན་སྡུར་ལ་ཞུགས་སྲོལ་ཡོད་པ་མ་རེད།

བུ་ཆུང་།  ཡོད་ད་ཡོད་ཀི། ངས་རིག་ཐ།  བརྙན་འཕྲིན་ནང་དུ་བུ་མོ་ཚོ་རྟ་ཆེན་པོ་རེ་ལ་ཞོན་ནས་རྟ་རྒྱུག་འགྲན་སྡུར་བྱེད་ཀྱིན་འདུག        ཨ་མ།  ངས་ཀྱང་མཐོང་སོང་།   ཨ་མ་ལ་མཚོན་ན།  ལས་ཀ་ལས་པར་ཞི་མོ་ཞི་ལུ་གཉིས་ཀར་ཁྱད་པར་གང་ཡང་མེད།  བསྟན་འཛིན་སྒྲོལ་མས་རྟ་རྒྱུག་བྱས་ཀྱང་ཆོག་ལ།   ཁྱོད་ཀྱིས་འབྲི་མོ་བཞོས་རུང་ཆོག   གང་ལྟར་ཚང་མས་ཟ་མ་ཟ་དགོས་པ་ནི་གཅིག་མཚུངས་རེད།

བུ་ཆུང་།  ངོ་མ་བདེན་གི།   ཨ་མ་ཁྱོས་རི་མོ་འདིར་ལྟོས་དང་།  ཨ་ཅེ་པདྨ་མཚོ་ནི་ཁྱོད་འདྲ་བའི་རྒན་མོ་ཞིག་རེད།  ཞི་མོ་ཆུང་ཆུང་ཞིག་མ་རེད།

ཨ་མ།  མ་རེད་མ་རེད།  ཨ་ཅེ་པདྨ་མཚོ་ཞི་མོ་ཆུང་ཆུང་ཞིག་རེད་ད།  མོས་ཟི་ཚར་ཆེན་པོ་ཞིག་གྱོན་ཡོད་པས་ཨ་ཅེ་ཆེན་པོ་ལྟར་སྣང་བ་རེད།  ད་ཁྱོས་ཉོན་དང་ཨ་མས་མུ་མཐུད་དུ་ཀློག་རྒྱུ་ཡིན།  ཞི་མོ་པདྨ་མཚོ་རྟ་རྒྱུག་འགྲན་སྡུར་ལ་ཞུགས་སུ་མ་བཅུག་པར་མོའི་ཕུ་བོ་ཚོས་ཐབས་ཤིག་དྲན་ཏེ།  ཁོ་མོ་ཞི་ལུ་ཞིག་ཏུ་བརྫུས་ནས་འགྲན་སྡུར་ལ་ཞུགས་རྒྱུ་བྱས་ན་ཅི་འདྲ་ཡིན་ནམ་ལབ།

བུ་ཆུང་། འོ་འོ།   མོའི་ཕུ་བོ་ཚོ་རྫུན་བཤད་མཁན་ཞིག་རེད།  རྫུན་བཤད་ན་བཟང་ནི་མ་རེད་ཨེ་ན།

ཨ་མ། བདེན་གི   རྫུན་བཤད་ན་མི་བཟང་བས།  པདྨ་མཚོས་ཞི་ལུ་ལ་བརྫུས་ནས་རྟ་རྒྱུག་མི་བྱེད་ཅེས་དང་ལེན་མ་བྱས་པ་རེད།

བུ་ཆུང་།  འོ་ཡ།   པདྨ་མཚོ་བཟང་གི  མོ་རང་ཞི་མོ་བསམ་ཤེས་ཤིག་རེད་ཨེ་ན།   ཨ་མ།  མགྱོགས་པོར་ཀློགས་དང་།   ངས་པདྨ་མཚོ་རྟ་རྒྱུག་འགྲན་སྡུར་ལ་ཞུགས་ཨེ་ཐུབ་ལ་ལྟ་འདོད་ཆེ།

ཨ་མ། དེའི་རྗེས་སུ་རྔ་བའི་རྟ་རྒྱུག་འགྲན་ཞུགས་པ་རེ་རེ་བཞིན་རྗེས་སུ་ལུས་སོང་བས།  སྡེ་དཔོན་རྣམས་ཐབས་ཟད་འུ་ཐུག་སྟེ།  ད་ནི་ཐབས་ཤེས་ཉག་ཅིག་འདུག    པདྨ་མཚོ་སྐྱ་རྩལ་བཟང་བས་ཁོ་མོ་རྟ་གཤིབ་བྱེད་དུ་བཅུག་ན་རེ་བ་ཞིག་ཨེ་ཡོད་ཅེས་གྲོས་བྱས་ཏེ།  པདྨ་མཚོར་བཤད་ཀྱང་།  མོས་ཞི་མོ་ཞིག་རྟ་རྒྱུག་འགྲན་སྡུར་ལ་ཞུགས་སྲོལ་མེད་པ་མིན་ནམ་ཞེས་དང་ལེན་མ་བྱས།  དེ་ནས་ཕ་མ་གཉིས་ཀྱིས་མོ་ལ་ཁ་བརྡ་བྱས་མཐར་པདྨ་མཚོ་ཁོང་དགོད་ཅིག་བྱེད་ཞོར་དུ་དང་ལེན་བྱས་སོང་།  དུས་དེ་ནས་བཟུང་།  ཁོ་མོས་འགྲན་ཐེངས་རེ་རེར་རྒྱལ་ཁ་བླངས་ཤིང་།  མཐར་ཐེངས་དེའི་རྟ་རྒྱུག་འགྲན་སྡུར་ཁྲོད་ཨ་མདོ་རྔ་བས་ཨང་དང་པོའི་རྟགས་མ་བླངས་པ་རེད།

བུ་ཆུང་།  ཨ་མ།    པདྨ་མཚོ་ཅིའི་ཕྱིར་ཁོང་དགོད་བྱས་པ་རེད།

ཨ་མ།  མོའི་སེམས་སུ།  མི་རྒན་རྣམས་ཀྱིས་རང་གི་མཚན་སྙན་གྲགས་ལ་ཐུག་དུས།  ཡུལ་སྲོལ་གོམས་གཤིས་ལའང་མི་བསྟུན་དོན་ཅི་ཡིན་ནམ་སྙམ་ནས་ཁོང་དགོད་ཤོར་བ་རེད།

བུ་ཆུང་། ངས་ཀྱང་དེ་འདྲ་ཞིག་བསམ་ཐ།   མི་རྒན་པ་ཚོས་ཅི་ཞིག་བཤད་ན་ཚིག་ཐོག་ནས་འདུག་དགོས་པ་ལས་འགྱུར་ཆོག་ནི་མ་རེད།  ཨེ་ན་ཨ་མ། ཁོ་ཚོས་ཐོག་མར་པདྨ་མཚོ་རྟ་རྒྱུག་འགྲན་སྡུར་ལ་ཞུགས་སུ་མ་བཅུག   རྗེས་ལ་ཞུགས་སུ་བཅུག་པ་དེ་ཚིག་ཐོག་ནས་མ་བསྡད་པ་རེད།

ཨ་མ།   རེད་ཡ།  དེ་འདྲ་བྱས་ན་མི་བཟང་གི་ཨེ་ན།  

བུ་ཆུང་།  ངོ་མ་རེད། ཁྱོས་ཅིག་བཤད་ཚར་དུས་ཁོ་ཚོ་ནང་བཞིན་འགྱུར་མ་འགྲོ་ཨ།   ཚིག་ཐོག་ཏུ་སྡོད་དགོས།

ཨ་མ།  ཧེ་ཧེ་ཧེ།   འོ་ཡ།   བྱིས་སྒྲུང་འདི་ཨེ་ཡག་ཐ།  

བུ་ཆུང་།  ཡག་གི་ཡ།   ངའང་རྟ་རྒྱུག་འགྲན་སྡུར་ལ་ཞུགས་བསམ་གི།

ཨ་མ། ཆོག་ནི་རེད།   ཁྱོད་ལོ་བཅུ་ལ་སླེབས་ན།   རྟ་རྒྱུག་བྱེད་དུ་འཇུག་ཡ།

བུ་ཆུང་།  ཨེ།   ཨ་མ།  ཁྱོད་འགྱུར་མི་ཉན།  བརྗེད་དུ་མ་འཇུག་ཨ།   ང་ལོ་བཅུ་ལ་སོན་དུས་རྟ་རྒྱུག་བྱེད་ཀྱི་ཡིན།

ཨ་མ།  འོ་ཡ་ཡ།  ཨ་མའི་གཅེས་ཕྲུག