རྫིང་བུ་ཞིག་གི་ནང་དུ། རུས་སྤལ་ཞིག་དང་ངང་བ་གཉིས་ཡོད་པ་རེད། དུས་སྐབས་ཤིག་ན་ཡུལ་དེར་ཆར་བ་མ་བབས་པས་རྫིང་བུ་བསྐམས་སོང་བ་རེད། དེ་ནས་ངང་བ་གཉིས་རུས་སྤལ་གྱི་སར་སོང་སྟེ། ཝ་ཡེ་གྲོགས་པོ། ད་ངེད་གཉིས་འདིར་འདུག་བཟོད་མི་བདེ་བས། རྫིང་བུ་གཞན་ཞིག་འཚོལ་དུ་འགྲོ་བ་ཡིན་ཞེས་བཤད་པ་རེད།
རུས་སྤལ་གྱིས། དེ་ན་ང་ཡང་མཉམ་དུ་ཁྲིད་རོགས་ཞེས་བཤད། ངང་བ་གཉིས་ཀྱིས་ངེད་གཉིས་ལ་ཁྱེད་འཁྲིད་འདོད་ཡོད་ཀྱང་། ཁྲིད་ཐུབ་པའི་ཐབས་ཤེས་མི་འདུག་ཅེས་བཤད། རུས་སྤལ་ན་རེ། ཁྱེད་གཉིས་ཀྱིས་ངོ་མའི་ང་འཁྲིད་འདོད་ན། ཐབས་ང་ལ་ཡོད་ཅེས་བཤད། ངང་བ་གཉིས་ཀྱིས་ཁྱེད་ལ་ཐབས་ཡོད་ན་གསུང་དང་། ང་ཚོ་མཉམ་དུ་འགྲོ་ཆོག་ཅེས་ལབ་པ་རེད།
དེ་ནས་རུས་སྤལ་གྱིས་ཤིང་ཐུར་གཅིག་ཁྱེར་འོང་ནས། ཁྱེད་གཉིས་ཀྱིས་ཤིང་ཐུར་འདིའི་སྣེ་རེ་རེ་ལ་སོས་ཐོབས་ལ་ནམ་མཁར་འཕུར་དང་། ངས་ཤིང་ཐུར་འདིའི་དཀྱིལ་ལ་སོ་འདེབས་ནས་འདུག་ཆོག་ཅེས་ཟེར་བ་ན། ངང་བ་གཉིས་ཀྱིས་དེ་ནི་ཐབས་ཤེས་མཆོག་ཏུ་གྱུར་བ་ཞིག་རེད་ཅེས་བཤད་དེ། ཤིང་དུར་དེའི་སྣེ་གཉིས་ནས་སོས་བཟུང་སྟེ་ཡར་བཏེགས་ནས་མཁའ་ལ་འཕུར།
ངང་བ་གཉིས་ཀྱིས་དེ་ལྟར་རུས་སྤལ་བཀྱགས་ནས་ནམ་མཁའ་རུ་འཕུར་ཏེ་སོང་སོང་བའི་ཚེ་ན། ལུང་བ་ཞིག་གི་ཁ་ན་ཡོད་པའི་རྫི་བོ་ཞིག་གིས་མཐོང་སྟེ། རྫི་བོ་གཞན་ཚོར་ཁ་ཕྱོགས་ཏེ། ཀ་ཡེ་གྲོགས་པོ་ཡར་ལྟོས་དང་ངང་བ་དེ་གཉིས་ག་འདྲའི་རིག་པ་རྒོད་པ་ལ་ཟེར། རུས་སྤལ་གྱིས་གཏམ་དེ་ཐོས་པ་དང་། ང་རྒྱལ་སྐྱེས་ཏེ་ཁ་རིག་པ་འདི་ངས་དྲན་པ་ཡིན་ཅེས་ཁ་གདངས་པས། ཤིང་ཐུར་ཁ་ནས་ཤོར་བ་དང་རུས་སྦལ་ནམ་མཁས་ནས་མར་ཟག་པ་རེད།
མཁས་གྲུབ་གྱིས་རི་མོ་བྲིས།
གཡག་རྒོད་དྲ་ཚིགས་ཀྱི་ཆོག་མཆན་མེད་པར་བྱིས་སྒྲུང་འདི་གཞན་ལ་བརྒྱུད་འགོད་བྱེད་མི་ཆོག