དཔེ་ཀློག་འཆར་ཟིན།

དྲུག་དཀར། (ཟི་ལིང་།)

རིས་སྒྲུང་གིས་སྔར་བཞིན་ལོ་ངོ་བཞི་བཅུར་སོན་པའི་ཁོ་མོའི་དང་བ་འདྲེན།  རི་མོ་དང་ཡི་གེ་བསྡེབས་ནས་ཡོད་པས།  གཏམ་རྒྱུད་ཀྱི་བྱུང་རིམ་ལ་འཕྱོ་འཇགས་ཡོད་མེད་ཇི་ལྟར་ཀྱང་། བརྗོད་བདེ་ལ་གཏིང་ཟབ་བའི་ཤུགས་བསྟན་དག་རི་མོའི་གསེང་ལ་གབ་ནས་འདུག ཡིད་སེམས་དབང་མེད་འགུག་པའི་གཏམ་རྒྱུད་ཅིག་གམ།  སྣང་བ་ཀུན་ནས་འདྲེན་པའི་མི་སྣ་དང་དོན་དག་ཅིག ཡང་ན་མཛེས་ཤིང་ལྟ་ན་སྡུག་པའི་རི་ཀླུང་དང་མཚོ་མཚེའུ།  ངོ་མཚར་ཀུན་གྱིས་ཕྱུག་པའི་གཟའ་སྐར་གྱི་འཆར་ནུབ།  མཛེས་སྡུག་རྣམ་པར་རྒོད་པའི་མེ་ཏོག་དང་ལྗོན་ཤིང་། དུད་དེ་འགྲོ་ཞིང་འཕུར་ནས་བསྐྱོད་པའི་གཅན་གཟན་དང་འདབ་ཆགས་སོགས་སྤྲོ་སྣང་ལྡན་པའི་གཏམ་རྒྱུད་སྣ་ཚོགས་ཏེ། མདོར་ན་བསམ་གཞིག་དང་ཀུན་རྟོག་གི་འདབ་ལག་རྐྱོང་ཐུབ་པའི་ཁྱབ་ཁོངས་གང་དེ།  རིས་དེབ་ཀྱིས་ཚོན་མདངས་རྣམ་པར་བཀྲ་བའི་ཁ་དོག་ལ་བརྟེན་ནས་མཚོན་ཐུབ།  ཡི་གེས་མཚོན་ཐབས་མེད་པའི་མཛེས་སྡུག་དེ་ཁ་དོག་གིས་མཚོན་ཐུབ་ཅིང་།  མིག་གིས་འཛིན་ཐབས་མེད་པའི་བསམ་གཞིག་དང་བརྩེ་བ་སོགས་ཡི་གེས་དགྲོལ་ཐུབ།  ཡི་གེ་ཉུང་ཞིང་སྐད་ཁམས་ཕུན་སུམ་ཚོགས་པ་དང་།  རི་མོ་སླ་ཞིང་སྟབས་བདེ་ཡིས་ཀུན་རྟོག་འཕྲོ་ཡུལ་ཆེ་རུ་བསྐྱེད་པ་མི་བཟང་ངམ། དཔེར་ན།  ཉི་ཧོང་གི་ཏན་ཌ་ཀོ་ས་ཀེ1（ཡི་གེ）དང་།    ཨི་མོ་ཏོ་ཡོ་ཀ2（རི་མོ）ཡི《ལྟ་ལེན་སྲེ་བོ་ཡི་རྨི་ལམ》3ལྟ་བུ།  ད་རུང་ཉི་ཧོང་གི་རིས་སྒྲུང་འབྲི་མཁན་ཕུལ་དུ་བྱུང་བ་ཀོ་ནི་ཤི་ཡ་སུ་ན་རི4ལགས་ཀྱི《གཏུམ་འབྲུག་སྐོར་གྱི་མུ་འབྲེལ》ལྟ་བུ།  འདི་ནི་མི་རྒན་ངའི་མཐོང་སྣེ་འཚག་སེལ་ཁོ་ན་ཡིན་གྱི་གཞན་མིན་ནོ། །གཅིག་ཏུ་ན། ང་རང་མི་སྒེར་གྱི་དགའ་ཕྱོགས་དེ་བྱིས་པའི་བག་ཆགས་ལ་བསྒོས་པས། བྱིས་པ་ཡང་རིས་སྒྲུང་ལ་དགའ་བར་མ་ཟད། ཁོས་རང་ཉིད་ཀྱི་ཀུན་རྟོག་དང་དགའ་ཕྱོགས།    དངོས་ཡོད་འཚོ་བའི་ཁྲོད་ཀྱི་ཉམས་མྱོང་གཞིར་བཟུང་སྟེ་མཇུག་འབྲས་སྣ་ཚོགས་ལ་སྔོན་དཔག་བྱེད། ལན་རེར་བྱིས་པའི་ཕུན་སུམ་ཚོགས་པའི་ཀུན་རྟོག་གིས་ཧང་སང་བར་བྱེད་ཅིང་། རང་གི་རྫི་མེད་སྣང་ཆུང་དང་།  ཐབས་ཆག་སླ་བཅོས་ཀྱི་བྱ་སྤྱོད་ཀྱིས་བྱིས་པའི་ཀུན་རྟོག་གི་འདབ་གཤོག་ལ་རྨས་སྐྱོན་ཕོག་དོགས་ཀྱི་སེམས་ཚེགས་ཤིན་ཏུ་ཆེ།  མིག་སྔར་དོགས་འཚེར་ཆེས་ཆེ་ས་ནི་ཇི་ལྟར་མ་བསླད་པའི་བྱིས་བློར་སྲུང་སྐྱོབ་བྱ་རྒྱུ་དེ་རེད།

《པདྨ་མཚོའི་འགྲན་རྩོད》ཅེས་པ་ནི་མིག་སྔར་ངས་བཀླགས་པའི་སྤུས་ཚད་མཐོ་ཤོས་ཀྱི་ཕ་སྐད་རིས་སྒྲུང་དེབ་ཅིག་ཡིན། དེའི་སྟེང་གི་རི་མོ་དག་ལས་ས་ཁོངས་རང་བཞིན་དང་། མི་རིགས་རང་བཞིན་མངོན་པར་གསལ།  ཡི་གེ་བསྡུས་ཤིང་གནད་འདུས།  གཏམ་རྒྱུད་ལས་ང་ཚོའི་མི་རིགས་ཀྱི་བས་མཐའི་བསམ་གཞིག་གཏོང་སྟངས་མངོན།  ཕྱི་རོལ་གྱི་འཇིག་རྟེན་ཇི་ལྟར་འགྱུར་རུང་།  ང་ཚོའི་ཕ་ཡུལ་གྱིས་སྔར་བཞིན་རང་གི་དག་གཙང་བསྲུངས་ནས་ཡོད་ཅིང་།  རང་བྱུང་ཁམས་ཀྱིས་བསྐྲུན་པའི་དྭངས་ཤིང་གཙང་བའི་མཁའ་དབུགས་དང་རྩྭ་ཆུ།  དེར་བཟུང་བའི་དད་གུས་ཀྱི་བསམ་པ་འགྱུར་མེད།  དེ་བཞིན་དུ་ཤ་རུས་ཀྱི་གཏིང་ལ་ཟུག་པའི་འདུ་ཤེས་འཛིན་སྟངས་ཏེ། ཕོ་མཆོག་མོ་དམན་གྱི་ལྟ་ཚུལ་ལའང་འགྱུར་བ་བྱུང་མེད། སོ་སོས་བློས་མི་དཔོག་པ་ཞིག་ལ།  མཐོ་རིམ་སློབ་གསོ་མྱངས་པའི་བུད་མེད་དག་གི་ཁྲོད་ནའང་འདུ་ཤེས་དེ་འདྲ་ཅན་འདུག འདི་ནི་མི་སྒེར་གྱི་གནད་དོན་ཡིན་ནམ། ལོ་རྒྱུས་ཀྱིས་བཞག་པའི་རིག་གནས་རྒྱུད་རྒྱུ་ཡི་གནད་དོན་ཡིན་ནམ། མདོར་ན། འདི་དག་ཐམས་ཅད་བུད་མེད་རང་ངོས་ནས་རྩོད་ལེན་བྱེད་དགོས་པ་ལས་གཞན། རང་གི་ཉེ་འཁོར་གྱི་གྲོགས་པོ་སྐྱེས་ཕོ་རྣམས་དང་། ཁྱོ་ག  བྱིས་པ་ཚུན་ཆད་ལ་ཕོ་མོའི་ཐོབ་ཐང་འདྲ་མཉམ་ཡིན་པའི་བསམ་བློའི་ཁ་དོག་བསྒོ་དགོས།  མ་འོངས་པར་རང་གི་བུ་བསམ་པའི་དོན་འགྲུབ་ཀྱང་བུ་མོ་སུ་ཞིག་གི་དགའ་རོགས་དང་། བུད་མེད་སུ་ཞིག་གི་ཁྱོ་གབྱིས་པ་གང་ཞིག་གི་ཕ་རྒན་ལ་འགྱུར་ངེས་པས།    རང་གི་ཉེ་འཁོར་ནས་མགོ་རྩོམ་དགོས།  དེས་ན།  ངས་བུ་དང་མཉམ་དུ《པདྨ་མཚོའི་འགྲན་རྩོད》ལ་བལྟ་དགོས་ཤིང་།  ད་ནས་བྱིས་པར་བུད་མེད་ལ་བརྩི་བཀུར་བྱེད་དགོས་པའི་སློབ་གསོ་སྤྲོད་དགོས།  ཆུ་ཐིགས་རྟག་ཏུ་འབབ་པ་ཡིས། །བྲག་གི་རི་བོ་འབིག་ལ་ལྟོས། །ཞེས་པ་བཞིན། བུ་ཆུང་མ་འོངས་པར་སྐྱེས་པ་ལེགས་བྱང་ཅན་ཞིག་ལ་འགྱུར་བའི་རེ་བ་འཛིན་གི་ཡིན། འདི་ནི་ངེད་མ་བུ་གཉིས་ཀྱིས་དེབ་དེ་ངེས་པར་བཀླག་དགོས་པའི་རྒྱུ་རྐྱེན་གཅིག་ཡིན་ལ།  དེབ་དེའི་རིན་ཐང་མངོན་དུ་གྱུར་པའང་རེད།

2021/11/8ཉིན་གཞན་གྱིས་བསྒྱུར།