༄༅།། གནའ་སྔ་མོ་ཞིག་ན། སྡོང་རྒན་ཞིག་གི་མགོ་ན་བྱ་ཁྭ་ཏ་ཞིག་གིས་ཚང་བཞག་ཡོད་པ་དང་། སྡོང་རྒན་དེའི་རྩ་ན་ཝ་མོ་མ་བུ་བཞིས་ཁུང་བུ་བརྐོས་ཏེ་ཝ་ཚང་བཅས་ཡོད་པ་རེད།
ཉིན་ཞིག་བྱ་ཁྭ་ཏས་ཤ་རྡོག་ཅིག་སྡོང་མགོ་རུ་བཟུང་འོང་ནས་ཟ་བཞིན་པའི་སྐབས། སྡོང་རྩ་ན་ཡོད་པའི་ཝ་ཕྲུག་རྣམས་ཀྱིས་མཐོང་སྟེ་ཟ་འདོད་ཀྱི་འགྲམ་ཆུ་ཁ་ནས་འཛར་ཞོར་དུ། ཨ་ཁུ་ཁྭ་ཏ། ཨ་ཁུ་ཁྭ་ཏ་ལགས། ཉིད་ཀྱིས་ཟ་བཞིན་པའི་ཤ་དེ་ག་འདྲའི་ཞུམ་མདོག་ལ། ང་ཚོར་ཤ་རྡོག་རེ་སྤྲོད་དང་ཞེས་ཞུ་བ་འཐེན། ཁྭ་ཏས་ཤ་ལོག་ཤིང་སྡོང་གི་ཡལ་གའི་སྟེང་བཞག་སྟེ་རྫིགས་ཉམས་སྟོན་ཞོར་དུ་ན་རེ། ཟས་ཞིམ་པོ་ཟ་འདོད་ན། རང་གིས་དཀའ་ལས་རྒྱག་དགོས་རེད་ཅེས་མ་སྤྲད་པ་རེད།
དགོང་མོ་ཝ་མོ་ཁྱིམ་དུ་བསླེབས་དུས། ཕྲུག་གུ་རྣམས་ཀྱིས་ཁ་ཏས་ཤ་མ་སྤྲད་པའི་ལོ་རྒྱུས་བཤད་པ་ན། ཝ་མོས་ངའི་སྙིང་གི་གཅེས་ལོ་ཚོ། ཉོན་དང་། འཇིག་རྟེན་གྱི་གཏམ་དཔེར། དྲང་མོ་བཤད་ན་མི་དགའ་ཟེར་བ་ལྟར། བྱ་ཁྭ་ཏར་ངོ་སྟོད་བཤད་དགོས་པ་ལས། དྲང་མོ་བཤད་ས་ཡོད་པ་མ་རེད། སེང་ཉིན་ཁྱེད་རྣམས་ཀྱི་ལྟོས་དང་། ངས་ཁ་ཏའི་ཁ་ནས་ཤ་རྡོག་ཞིག་ལེན་ཐབས་བྱེད་ཅེས་བཤད་ནས་ཉལ།
ཕྱི་ཉིན་ཁ་ཏྭས་ཡང་ཤ་རྡོག་ཞིག་སྡོང་མགོར་ཁྱེར་ཡོང་ནས་ཟ་གྲབས་བྱེད་བཞིན་པའི་སྐབས་སུ། ཝ་མོ་སྡོང་རྩར་སོང་སྟེ། ངག་འཇམ་པོས། ཨ་ཁུ་ཁྭ་ཏ་ལགས། ཁྱོད་ཀྱི་ལུས་ནི་གསེར་ནག་གི་མདོག་ཡིན་པས། འཇིག་རྟེན་འདི་ན་ཁྱོད་ལས་མཛེས་པ་ཞིག་བྱུང་མྱོང་ཡོད་པ་མ་རེད། ཅེས་ཁ་ཡག་བཤད། ཁྭ་ཏ་ང་རྒྱལ་དང་བཅས་སྡོང་མགོ་ནས་གཤོག་རྡེབ་འགའ་བྱས་ནས་བསྡད།
ཝ་མོས་ཡང་བསྐྱར་འདི་སྐད་དུ། ཨ་ཁུ་ཁྭ་ཏ་ལགས། འདབ་ཆགས་གཞན་ཚོས་བཤད་ན། ཁྱོད་བྱ་ཀ་ལ་བང་ཀའི་ཚ་བོ་རེད་ཟེར། ཁྱོད་ལས་ལྷག་པའི་ངག་བདེ་བ་དང་། སྐད་སྙན་པ་ཞིག་གནམ་འོག་ན་ཡོད་པ་མ་རེད་ཟེར་བས། ཁྱོད་ཀྱིས་གླུ་ཞིག་ལེན་རོགས་ཞེས་ངོ་སྟོད་བྱས། ཁྭ་ཏ་སྔར་ལས་ཀྱང་ང་རྒྱལ་སྐྱེས་པ་དང་། སེམས་ལ། ངས་ཝ་ངན་མ་འདི་ལ་གླུ་ཞིག་མ་བླངས་ན། རྗེས་སུ་འདབ་ཆགས་གཞན་གྱིས་འཕྱ་སྨོད་བྱེད་རྒྱུ་རེད་བསམས་ཏེ། ཨ་བ། ཨ་བ། ཞེས་ཁ་གདེངས་པ་དང་མཉམ་དུ་ཁའི་ནང་གི་ཤ་ལོག་མར་ཟག་སོང་བ་རེད། ཝ་མོས་ཤ་ལོག་ཁུར་ཏེ་དགོད་མ་འཛུམ་གྱི་ངང་ནས་ཁུང་བུར་འཛུལ་ནས་ཝ་ཕྲུག་ཚོར་ཤ་ཟ་རུ་བཅུགས་སོ།།
ལྕགས་མོ་འཚོས་ལེགས་བཅོས་བྱས་པ་དང་མཁས་གྲུབ་གྱིས་རི་མོ་བྲིས།
གཡག་རྒོད་དྲ་ཚིགས་ཀྱི་ཆོག་མཆན་མེད་པར་བྱིས་སྒྲུང་འདི་གཞན་ལ་བརྒྱུད་འགོད་བྱེད་མི་ཆོག